“Volvo”, “Visa”, “Bank of America”, “Coca-Sola”, “Sberbank”, “Sibur” kimi məşhur şirkətlərin rəhbərlərini konsultasiya edən Dr. İtsxak Adizes Bakıda keçirilən “Təşkilatın uğur formulu” adlı biznes forumda çıxış edib.
“APA-Economics”in məlumatına görə, dünya şöhrətli eksperti bu forumda 200-dən çox şirkət qurucusu və böyük şirkətlərin aparıcı vəzifələrində çalışan nümayəndələri dinləyib.
İtsxak Adizes bazarda lider olmağın, effektiv menecment sisteminin qurulması, uğurlu idarəetmə vasitələrinin tətbiqi üzrə innovativ yanaşma kimi şirkət inkişafında əhəmiyyətli rol oynayan mövzulardan danışıb. O, çıxışında fərqli insanları bir araya gətirərək onlardan güclü komanda yaratmağın effektivliyini də vurğulayıb.
“Holmes Report” şirkəti Roma Papası Fransisk, Dalay Lama, Almaniyanın Kansleri Angela Merkel, Fransa Prezidenti Emmanuel Makron və Kanadanın baş naziri Castin Trüdo ilə yanaşı Dr. İtsxak Adizesi “2017-ci ilin ən yaxşı ünsiyyətçisi” adlandırıb. Belə ki, menecment sahəsinin əfsanəsi, dünyanın ən nüfuzlu biznes-konsultantlarından biri olan İtsxak Adizes 52 ölkədə 2 000-dən çox təşkilatın tətbiq etdiyi metodologiyanın müəllifidir.
Dr. İtsxak Adizesin zəngin təcrübəsinə hökumət və dövlət rəsmiləri ilə iş də daxildir. O, İsrail, İsveç, Braziliya, Meksika, Çernoqoriya, Qazaxıstan kimi hökumət üzvlərini konsultasiya edərək, məsləhətlərini verib.
“Təşkilatın uğur formulu” forumunda İtsxak Adizes ilə yanaşı sahibkarlıq sahəsində 15 illik iş təcrübəsinə malik peşəkar idarəçi, Azərbaycanda Adizes İnstitutunun konsultantı və təlimçisi Pavel Belorusski də çıxış edib. O, Adizes metodologiyasının praktiki alətləri barədə danışıb. Forumda bu metodologiyanı artıq öz şirkətlərində sınaqdan keçirən rəhbərlər bu təcrübəni tədbir iştirakçıları ilə paylaşıblar.
“Təşkilatın uğur formulu” forumunun sonunda tədbir iştirakçılarının dünya şöhrətli ekspertlə sual-cavab sessiyasında iştirak etmək fürsəti də olub.
Forumun baş sponsoru qismində “Pasha Bank”, sponsorları qismində “Gilan Holding” və “Italdizain”, tərəfdaş qismində isə “ADA Foundation”, “Express Group” və ABTC şirkətləri çıxış ediblər.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
