“Lombard fəaliyyəti subyektlərinin hüquq və vəzifələri, habelə bu sahədə mexanizmləri tənzimləyən normaların olmaması vətəndaşların hüquqlarının pozulmasına, əmlaklarının satılması zamanı pozuntulara və digər neqativ hallara yol verməsinə səbəb olub”.
APA-nın məlumatına görə, bunu bu gün Milli Məclisin İqtisadi siyasət, sənaye və sahibkarlıq komitəsinin sədri Ziyad Səmədzadə növbədənkənar sessiyasının iclasında “Lombardlar haqqında” qanun layihəsinin birinci oxunuşda müzakirəsi zamanı bildirib.
Z. Səmədzadə deyib ki, araşdırmaların nəticəsində neqativ halların çoxluğunu nəzərə alaraq, bu sahədə səmərəliliyin artırılması və süni istifadə hallarının qarşısının alınması, lombard xidmətinin istehlakçılarının hüquqlarının qorunması məqsədi ilə “Lombardlar haqqında” qanunun layihəsinin hazırlanması qərara alınıb: “İqtisadi siyasət, sənaye və sahibkarlıq komitəsinin iclasında qanun layihəsi ilə bağıl bir sıra fikirlərini söylədilər. Vergilər Nazirliyindən əldə edilən məlumata əsasən, ölkədə ərazisində müvafiq dövlət qeydiyyatından keçmiş 700-dən artıq lombard fəaliyyəti ilə məşğul olan təsərrüfat subyekti müəyyən edilsə də, onların təxminən yarısı aktiv fəaliyyətini davam etdirir. Aktiv lombard fəalyiyəti ilə məşğul olan subyektlərin 250-yə yaxını fiziki şəxslərdir. 2018-ci il ərzində ölkədə fəaliyyət göstərən lombardlardan büdcəyə daxil olan vergilərin ümumi məbləği cəmi 938 min manat olmaqla, sadə bölgü əsasında hər bir lombard üzrə orta hesabla 2-3 min manatdan çox deyil. Bu isə aktiv fəaliyyət göstərən lombardların fəaliyyətinin tənzimlənməsinin təmin edilməsi halında ödənişlərin artacağını deməyə əsas verir”.
Komitə sədri qeyd edib ki, qanun layihəsində lombardların iki növ fəaliyyətlə – daşınar əşyaların girova qəbul edilməsi müqabilində kreditlərin verilməsi və daşınar əşyaların saxlanılması və qəbul edilməsi ilə məşğul ola biləcəklər: “Lombard girov qoyulmuş və saxlanmağa qəbul olunmuş əşyaları yalnız özündə və ya müqavilə əsasında Azərbaycan ərazisində fəaliyyət göstərən banklarda, yaxud xarici bankların yerli filiallarında saxlaya biləcəklər”.
Z. Səmədzadə bu qanunun aztəminatlı ailələr üçün son dərəcə vacib olduğunu vurğulayıb: “Aztəminatı ailələrin lombarda müraciət etməsi təbiidir. Ancaq bunun qanunvericilik bazasının möhkəmləməsi sui-istfiadə hallarının da aradan qaldırılmasına kömək edəcək. Eyni zamanda bildirmək istərdim ki, İqtisadi siyasət, sənaye və sahibkarlıq komitəsində səslənmiş fikirlərlə əlaqədar Maliyyə Bazarlarına Nəzarət Palatası konkret təkliflər hazırlayır. Palata komitədə deputatların irəli sürdükləri fikirlərə müsbət yanaşır. Əminəm ki, həmin fikirlər ikinci oxunuşda bu qanun layihəsinin daha da təkmil olmasına şərait yaradacaq”.
Qeyd edək ki, qanun layihəsi birinci oxunuşda qəbul edilib.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
