Bakıda yeni kiçik SES istismara verilib

Bakıda yeni kiçik SES istismara verilib
  • Clock-gray 11:40
  • calendar-gray 13 Dekabr 2019

“Azərenerji” ASC sentyabr ayında Şüvəlan qəsəbəsində istismara verilən 400 MVt-lıq “Şimal-2” elektrik stansiyasında daha bir irəliləyiş edib. Cənub Qafqaz regionunda ən yüksək faydalı iş əmsalına malik “Şimal-2” elektrik stansiyasının ərazisində kiçik su elektrik stansiyası (SES) tikilib.

ASC-dən “APA-Economics”ə verilən məlumata görə, indiyədək “Şimal-2”nin buxar turbininin kondensatorunun soyudulması üçün Xəzər dənizindən götürülən su geri dönərək yenidən dənizə tökülürdüsə, artıq geri qayıdan həmin su yeni tikilən kiçik SES-ə daxil olur və suyun kinetik enerjisindən istifadə edilməklə enerji alınır. Kiçik SES-in tikintisi yerli mütəxəssislər tərəfindən aparılıb və montaj prosesində yerli mütəxəssislərlə yanaşı xarici mütəxəssislər də iştirak edib. Stansiyanın tikintisi, sifariş verilən avadanlıqların gətirilməsi və montajı bir neçə ayın içində yekunlaşdırılıb.

300 kVt-lıq kiçik SES vasitəsi ilə il ərzində 2,5 mln. kVt-saata yaxın elektrik enerjisi alınacaq ki, bu da ölkənin ikinci böyük elektrik stansiyası olan “Şimal-1” və  “Şimal-2” elektrik stansiyalarının təsərrüfat ehtiyaclarını ödəməklə daxili tələbatına sərf olunacaq. Nəticədə bu günə qədər “Şimal” elektrik stansiyasının daxili tələbatına sərf olunan elektrik enerjisi qənaət edilərək ümumi sistemə ötürüləcək.

Qeyd edək ki, “Azərenerji” ASC “Şimal” elektrik stansiyasında olduğu kimi digər elektrik stansiyalarında da analoji olaraq qayıdan sudan faydalanıb əlavə enerji istehsal etmək niyyətindədir. Artıq “Cənub” elektrik stansiyasının daxilində də belə bir kiçik su elektrik stansiyasının tikilməsi planlaşdırılıb.

APA-Economics

Digər xəbərlər