Sənaye və energetika

Ana səhifə

CQD Avropanın enerji təhlükəsizliyinin möhkəmləndirilməsinə xidmət edir - BƏYANAT

12 fevral 2021 11:18 (UTC +04:00)

“2021-ci il 11 fevral tarixində videokonfrans formatında Bakıda keçirilmiş Cənub Qaz Dəhlizi (CQD) Məşvərət Şurası çərçivəsində nazirlərin 7-ci iclası Azərbaycan Respublikası ilə Avropa İttifaqı arasındakı strateji enerji tərəfdaşlığını təsdiq edir, CQD layihəsinin tamamlanmasını və Azərbaycandan Avropa İttifaqına qaz təchizatının başlanmasını alqışlayır”.

Energetika Nazirliyindən “APA-Economics”ə verilən məlumata görə, bu barədə İclasın həmsədrləri Azərbaycanın energetika naziri Pərviz Şahbazov və Avropa Komissiyasının enerji məsələləri üzrə komissarı Kadri Simson, həmçinin, qonşuluq siyasəti və genişlənmə məsələləri üzrə komissarı Oliver Varhelyi tərəfindən birgə bəyanatında deyilir.

Bəyanata əsasən, bu tarixi nailiyyət 3 500 km uzunluğunda dəyər zənciri boyu hökumətlər, beynəlxalq təsisatlar, maliyyə-kredit təşkilatları, hasilat və nəql sistemlərinin operatorları, podratçı şirkətlər, icmalar və yerli hakimiyyət orqanları arasında möhkəm əməkdaşlıq əsasında qurulmuşdur.

“Biz Cənub Qaz Dəhlizini Azərbaycan Respublikasındakı “Şahdəniz” yatağından qazın Avropaya təhlükəsiz, etibarlı və rəqabət qabiliyyətli tədarükünü təmin edən mühüm yeni ötürücü sistem kimi qəbul edirik. CQD Avropa ölkələrinin enerji təhlükəsizliyinin möhkəmləndirilməsinə, Avropa enerji bazarına inteqrasiyasının daha da asanlaşdırılmasına, Cənubi və Mərkəzi Avropadan keçən qaz şəbəkələrinin əlaqələndirilməsi ilə bağlı fəaliyyətə töhfə verən strateji hədəfə xidmət edir.

Avropaya qazın şaxələndirilmiş, sabit, təhlükəsiz şəkildə tədarükünü təmin etmək və daha böyük iqtisadi tərəfdaşlıq imkanlarından faydalanmaq məqsədi daşıyan Cənub Qaz Dəhlizinin reallaşdırılması ilə bağlı uzunmüddətli öhdəliyin yerinə yetirilməsində Azərbaycan Respublikası Hökumətinin fundamental rolunu vurğulayırıq.

Biz Cənub Qaz Dəhlizinin texniki, tənzimləyici və kommersiya imkanlarına əsaslanan yeni enerji bazarlarına doğru genişlənmə potensialının araşdırılmasına yönəlmiş bütün maraqlı tərəflərin, o cümlədən karbonsuz enerji sisteminə keçid istiqamətində irəliləyişlərinə töhfə verəcək Qərbi Balkan ölkələrinin səylərini dəstəkləyirik”, - bəyanatda deyilir.