IEA qlobal neft ehtiyatlarının azalması şərtlərini açıqlayıb

IEA qlobal neft ehtiyatlarının azalması şərtlərini açıqlayıb
  • Clock-gray 17:41
  • calendar-gray 19 Yanvar 2021

Bu ilin I rübündə qlobal kommersiya neft ehtiyatları 100 mln. barel və ya orta hesabla gündəlik 1,1 mln. barel azala bilər.

"APA-Economics"in Beynəlxalq Enerji Agentliyinin (IEA) aylıq hesabatına istinadən verdiyi məlumata görə, bu, "OPEC+" neft hasilatının azaldılmasına dair razılaşmanın 100% yerinə yetirilməsi və ittifaqdakı neft hasilatı üzrə əlavə azalmaları nəzərə almaq şərti ilə baş tuta bilər.

IEA artan qlobal tələbat fonunda 2021-ci ilin ikinci yarısında qlobal neft ehtiyatlarının bir qədər də azalacağını da proqnozlaşdırır.

Xatırladaq ki, 2020-ci il 12 aprel tarixli "OPEC+" razılaşmasının gündəlik xam neft hasilatının ümumilikdə 7,7 mln. barel azaldılması ilə bağlı ikinci mərhələsi 1 avqust – 31 dekabr tarixlərini əhatə edirdi. 2020-ci ilin 3 dekabr tarixində "OPEC+" nazirlərinin 12-ci iclasında qəbul edilmiş qərara əsasən, 2021-ci ilin yanvar ayı üçün gündəlik xam neft hasilatının "OPEC+" ölkələri tərəfindən 7,2 mln. barel, müvafiq olaraq Azərbaycan tərəfindən isə 123 min barel azaldılması nəzərdə tutulub. Bununla da, cari ilin yanvar ayında Azərbaycan üçün təklif olunan gündəlik neft hasilatı 595 min barel səviyyəsində müəyyən edilib. 2021-ci ilin 5 yanvar tarixində "OPEC+" ölkələri nazirlərinin 13-cü iclasında isə gündəlik xam neft hasilatı üzrə mövcud kvotaların fevral-mart aylarında da davam etdirilməsi barədə qərar qəbul edilib. Yeni razılaşmaya əsasən, "OPEC+" ölkələrinin gündəlik xam neft hasilatı üzrə ixtisarları fevralda 7,125 mln. barel, martda isə 7,05 mln. barel təşkil edəcək. Azərbaycanın isə bu ilin yanvar ayındakı 123 min barel həcmində öhdəliyi fevral-mart aylarında sabit şəkildə qalacaq. Beləliklə, yanvar, fevral və mart aylarında Azərbaycan gündəlik xam neft hasilatını 2020-ci ilin dekabr ayına nisbətən 8 min barel artıraraq hasilatı 595 min barel səviyyəsində saxlayacaq.

Emil İsmayılov

Digər xəbərlər