SOCAR dələduzluq faktları ilə bağlı vətəndaşlara müraciət edib

SOCAR dələduzluq faktları ilə bağlı vətəndaşlara müraciət edib
  • Clock-gray 12:49
  • calendar-gray 26 Yanvar 2021

Yanvarın 25-də "SOCAR Tower"də Quba rayonunun Təngəaltı kənd sakini, 1985-ci il təvəllüdlü Mövlanov Ehtiram Adil oğlu və onun qohumu ilə onların müraciəti əsasında görüş keçirilib.

SOCAR-dan "APA-Economics"ə verilən məlumata görə, onlar görüş zamanı bildirmişlər ki, son bir il ərzində SOCAR-ın adından istifadə edən bir qrup şəxs tərəfindən müxtəlif yollarla ("pandemiya ilə bağlı evdə qalın – SOCAR bunun əvəzində sizə pul ödəyəcək" və ya "SOCAR istismarda olmuş avtomobilləri hərraca çıxarır, iştirak haqqı ödəmək lazımdır" və s. kimi bəhanələrlə) aldadılaraq külli miqdarda maliyyə vəsaitləri mənimsənilib.

Məlumata görə, bir qrup dələduz SOCAR-ın nüfuzundan istifadə edərək hətta vətəndaşların etibarını qazanmaq və sonradan sui-stifadə etmək məqsədilə internetdə

www.socar-ltd.com adlı sayt açaraq şirkətin adından müxtəlif elanlar, məqalələr, xəbərlər yerləşdirmiş, vətəndaşlarla əlaqə zamanı bu sayta istinad ediblər. Aparılan araşdırma zamanı internetdə axtarış verərkən belə bir saytın mövcud olduğu müəyyən edilib.

Görüş zamanı vətəndaşlara qeyd olunan dələduz qrupun və saytın SOCAR-a heç bir aidiyyətinin olmadığı bildirilib, faktla bağlı hüquq-mühafizə orqanlarına müraciət etmələri tövsiyə olunub.

SOCAR bir daha ölkə vətəndaşlarına müraciət edərək bildirib ki, şirkət  tərəfindən hər hansı bir məsələ ilə bağlı vətəndaşlardan pul vəsaiti tələb olunmur. Son dövrdə bir neçə dəfə SOCAR adından vətəndaşların dələduzlar tərəfindən aldadılması hallarına rast gəlinmişdir. Bu kimi hallarla rastlaşan vətəndaşların hüquq-mühafizə orqanlarına müraciət etməsi tövsiyə olunur.

Emil İsmayılov

Digər xəbərlər