Nazirlər Kabineti “Azərbaycan Respublikasında yayılmış faydalı qazıntı yataqlarının qanunsuz işlənməsi nəticəsində dəymiş ziyana görə normativlər”in təsdiq edilməsi haqqında qərara aydınlıq gətirib.
Nazirlər Kabinetinin mətbuat xidmətindən APA-ya verilən məlumata görə, qərarı Azərbaycan Respublikasında faydalı qazıntı yataqlarının qanunsuz işlənməsi nəticəsində dəymiş ziyana görə yeni ödəmə normativlərinin təsdiq edilməsini nəzərdə tutur.
Bildirilir ki, indiyə qədərki ödənişlərin miqdarı əvvəlki iqtisadi şəraitə uyğunlaşdırılmışdı. Bu səbəbdən həmin qiymətlər hazırkı iqtisadi kontekstdə, ölkədəki mövcud iqtisadi artıma nisbətdə çox aşağıdır. Ona görə də mövcud ödəmə normativləri qanunsuzluqların qarşısını almağa, bu sahədə fəaliyyət göstərən subyektlərin məsuliyyətini artırmağa imkan vermir: “Odur ki, bu qərar faydalı qazıntı yataqlarının qanunsuz işlənməsi nəticəsində dəymiş ziyana görə ödənişlərin miqdarını yeni iqtisadi şəraitə uyğunlaşdıracaq. Nəticədə yeni ödəniş normativləri təbiətdən istifadə subyektlərinin məsuliyyətini artıracaq. Qərar təbii ehtiyatların qorunub saxlanması, səmərəli istifadəsi, mineral xammal bazasının bərpası baxımından xüsusi əhəmiyyət kəsb edir. Bu Qərarın tətbiqi bu sahədəki qeyri-müəyyənliklərin hüquqi cəhətdən dəqiq həll edilməsinə də imkan yaradacaq”.
Qeyd edək ki, qərara əsasən, Azərbaycan Respublikasında yayılmış faydalı qazıntı yataqlarının qanunsuz işlənməsi nəticəsində dəymiş ziyana görə normativlər aşağıdakı kimi müəyyənləşib:
Sıra №-si | Faydalı qazıntının adı | 1 m3 qanunsuz işlədilən faydalı qazıntıya görə (manatla) |
1. | Qum | 20.0 |
2. | Çınqıl | 20.0 |
3. | Çaqıl | 20.0 |
4. | Qırmadaş | 25.0 |
5. | Gil | 30.0 |
6. | Gilcə | 25.0 |
7. | Pemza | 25.0 |
8. | Gəc | 30.0 |
9. | Süxur (qarışıq) | 18.0 |
10. | Əhəngdaşı | 35.0 |
11. | Dolomit | 18.0 |
12. | Mergel | 25.0 |
13. | Kvars qumu | 35.0 |
14. | Mərmər | 300.0 |
15. | Qabbro | 700.0 |
16. | Tuflar | 20.0 |
17. | Travertin | 45.0 |
18. | Mərmərləşmiş əhəngdaşı | 230.0 |
19. | Seolit | 300.0 |
20. | Barit | 500.0 |
21. | Bentonit gilləri | 85.0 |
22. | Kaolin | 12.0 |
23. | Odadavamlı gillər | 15.0 |
24. | Vulkan külü | 35.0 |
25. | Bitumlaşmış qumlar | 60.0 |
26. | Çınqıl-qum qarışığı | 5.0 |
27. | Göl duzu | 340.0 |
28. | Daş duz | 450.0 |
29. | Gips | 35.0 |
30. | Məmulatdaşları(qiymətli, yarımqiymətli) | 45.0 |
31. | Dağ-mədən işləri ilə əlaqədar tullantılar | 15.0 |
Qeyd edək ki, torpağın üst münbit qatının qanunsuz götürülməsi zamanı hər 1 m3 üçün təbiətə dəymiş ziyanın məbləği 290 manat, xüsusi mühafizə olunan təbiət ərazilərində, turizm və rekreasiya zonalarında yer təkinin qanunsuz istismarı zamanı təbiətə dəymiş ziyanın məbləği 3 qat qiyməti ilə hesablanır. Bu qərarla təsdiq edilmiş normativlərə əsasən dəymiş ziyan hesablanarkən, birinci dəfə cərimələnən subyektlər üçün 0.7 əmsalı, ikinci dəfə cərimələnən subyektlər üçün 1 əmsalı, 3-cü dəfə cərimələnən subyektlər üçün 1.3 əmsalı, 3 dəfədən çox cərimələnən subyektlər üçün 1.5 əmsalı tətbiq edilir.