AÇG-də yerləşən dərin qaz ehtiyatları böyük potensiala malikdir

AÇG-də yerləşən dərin qaz ehtiyatları böyük potensiala malikdir
# 08 iyul 2019 12:49 (UTC +04:00)

Azərbaycanda bir sıra iri kəşfiyyat və hasilat layihələrin aparılmasında “Azəri-Çıraq-Günəşli” (AÇG) yataqlar blokunun dərin hissələrində yerləşən qaz ehtiyatlarının işlənilməsi məsələsi hələ müzakirə mövzusu deyil. Bu barədə “APA-Economics”ə Azərbaycanın neft-qaz sektorunda çalışan etibarlı mənbə söyləyib.

Mənbə qeyd edib ki, hazırda Fransanın “Total” şirkəti tərəfindən Azərbaycanın Xəzər sektorunda yerləşən “Abşeron” yatağında ABD-001 quyusunun istismar lüləsinin qazılması davam etdirilir. Bundan əlavə, Norveçin “Equinor” şirkəti “Əşrəfi-Dan Ulduzu-Aypara” blokunda və “Qarabağ” yatağında kəşfiyyat və qiymətləndirmə işlərinə hazırlaşır.

Mənbənin sözlərinə görə, BP şirkəti də gələn iki il ərzində ayrı-ayrı sazişlər çərçivəsində Azərbaycanda 6 kəşfiyyat quyusu qazmağa planlaşdırır: "Yəni, gələn bir neçə il ərzində Azərbaycanın karbohidrogen potensialını artıracaq bir sıra işlərin aparılması planlaşdırılır. Bu kontekstdə “Azəri-Çıraq-Günəşli”yataqlar blokunda dərin qazın işlənilməsi məsələsi hələlik müzakirə edilmir. Ölkəmizin neft və qaz ehtiyatları səmərəli və mərhələli olaraq işlənilməlidir. Bu baxımdan AÇG-də dərin qaz ehtiyatlarının işlənilməsinin də öz vaxtı gələcək”.

Mənbənin sözlərinə görə, AÇG-də yerləşən dərin qaz ehtiyatları böyük potensiala malikdir və gələcəkdə Azərbaycanın qaz potensialının genişləndirilməsinə öz töhfəsini verəcək.

Xatırladaq ki, AÇG yataqlar blokunun birgə işlənməsi və hasil olunan neftin pay şəklində bölüşdürülməsi haqqında (PSA) saziş 1994-cü il sentyabrın 20-də imzalanıb. 2017-ci ilin sentyabrın 14-də blok üzrə 2050-ci ilə qədər işlənməni nəzərdə tutan yeni saziş imzalanıb.

Layihədə pay bölgüsü bu nisbətdədir: BP - 30,37% (operator), AzACG (SOCAR) - 25,00%, "Chevron" - 9,57%, "Inpex" - 9,31%, "Equinor" (keçmiş "Statoil") - 7,27%, "ExxonMobil" - 6,79%, TPAO - 5,73%, "Itochu" - 3,65% və "ONGC Videsh Ltd." (OVL) - 2,31%.

Qeyd edək ki, yataqlar blokunun dərinliklərindəki qazın böyük işlənməsi isə yeni müqavilədən kənardadır və bu məsələ tərəfdaşlar arasında yenidən müzakirə olunmalıdır.

#
#

ƏMƏLİYYAT İCRA OLUNUR