Bakı-Tbilisi-Ceyhan boru kəməri vasitəsilə indiyədək 5 163 tanker və ya 4 milyard barrel neft dünya bazarlarına daşınıb, heç bir problem qeydə alınmayıb.
APA-nın İstanbul müxbiri xəbər verir ki, bu barədə Türkiyənin BOTAŞ şirkətinin Baş direktoru Burhan Özcan İstanbulda keçirilən Azərbaycan-Türkiyə II Enerji Forumunun açılışında bildirib.
O qeyd edib ki, TANAP vasitəsilə Türkiyəyə 18 milyard, Avropaya isə 16 milyard kubmetr qaz tədarük olunub.
BOTAŞ-ın direktoru, TANAP-ın gücünün ikiqat artırılması üçün texnik-mühəndislik işlərinə start verildiyini də diqqətə çatdırıb.
Bundan əlavə, Burhan Özcan Türkiyənin Duz gölündə təbii qaz quyularının qazılması və depolanması işlərində azərbaycanlı mütəxəssislərin də iştirak etdiyini bildirib.