Sosial

Ana səhifə

Sosial

Təhsil Nazirliyi Fransa, Niderland ali məktəbləri və Maastrixt İdarəçilik Məktəbinə azərbaycanlı tələbələrin qəbulu üçün müsabiqə elan edib

06 aprel 2009 13:44 (UTC +04:00)

Bakı. İlhamə İsabalayeva – APA. Təhsil Nazirliyi Nazirlər Kabinetinin ötən ilin iyununda təsdiqlədiyi “Xarici ölkələrdə təhsil alacaq Azərbaycan gənclərinin seçim qaydaları”na uyğun olaraq, Niderland Krallığı, Masstrixt İdarəçilik Məktəbinin menecment və MBA (Biznesin İdarəçilik üzrə Magistr) ixtisaslarının magistratura pilləsində, Fransanın ali məktəblərində təhsil almaq məqsədilə müsabiqə elan edib. Nazirlikdən APA-ya verilən məlumata görə, Niderland Krallığı, Masstrixt İdarəçilik Məktəbinin magistratura pilləsində təhsil almaq üçün müsabiqədə Azərbaycanın ali məktəblərinin magistratura pilləsinə keçirilən test imtahanlarında ən azı, 80 bal toplayan Azərbaycan vətəndaşları iştirak edə bilərlər.
Fransa ali məktəblərində təhsil almaq üçün elan edilən müsabiqədə 18 yaşı tamam olmuş, Azərbaycanın ali məktəblərinin bakalavr pilləsində təhsil alan və test imtahanlarında texniki sahələr üzrə ən azı 550, digər sahələr üzrə 600 bal toplayan tələbələr iştirak edə bilər. Fransa ali məktəblərinin magistratura pilləsinə müsabiqədə isə Azərbaycanın ali məktəblərinin magistratura pilləsinə qəbul üzrə aparılan test imtahanlarında texniki sahələr üzrə ən azı 70, digər sahələr üzrə ən azı 80 bal toplayan Azərbaycan vətəndaşları iştirak edə bilər. Müsabiqədə tibb ixtisası üzrə bakalavr təhsili üçün ən azı, bu tədris ilində VI kursda təhsil alanlar müraciət edə bilərlər. Hər iki müsabiqədə iştirak etmək istəyənlər sənədlərini aprelin 25-dək Təhsil Nazirliyinə təqdim etməlidirlər.