Azərbaycanda Dayanıqlı İnkişaf Məqsədlərinə (DİM) dair məlumatların əlçatanlığı və icra məsələləri BMT-nin Rezident Əlaqələndiricisinin Ofisi, Dayanıqlı İnkişaf üzrə Milli Əlaqələndirmə Şurası və Dövlət Statistika Komitəsinin birgə təşkil etdiyi məsləhətləşmənin diqqət mərkəzində olub.
BMT-nin Azərbaycan Nümayəndəliyindən APA-ya bildirilib ki, “Azərbaycan Qlobal DİM İndeksində” adlı tədbir hökumət və BMT qurumlarından 45-ə yaxın iştirakçını bir araya gətirib. Onlar qlobal və milli məlumat bazalarında uyğunsuzluqların və metodoloji problemlərin həlli, məlumatların olmadığı göstəricilər üçün məlumatların toplanmasının təkmilləşdirilməsi və geridə qalan göstəricilər üzrə yerlərdə irəliləyiş əldə olunması yollarını müzakirə ediblər. İştirakçılar həmçinin cavabdeh qurumların yerinə yetirməli olduğu konkret tədbirləri də müəyyən ediblər.
Azərbaycan 2016-cı ildən bəri Dayanıqlı İnkişaf Hesabatı və İndeksində 15 pillə irəliləyərək, 73,5 balla 163 ölkə arasında 50-ci yeri tutub. Bununla Azərbaycan regional orta göstəricisini də (71,6 bal) üstələyib. Bu mühüm irəliləyişə baxmayaraq, göstəricilər və məlumat mənbələrinin analizi əlavə diqqət tələb edən məsələləri ortaya çıxarıb.
Dayanıqlı İnkişaf Hesabatı və İndeksi hər bir ölkənin DİM-lərə nail olunmaqla bağlı mövqeyini qiymətləndirmək üçün dünya üzrə ilk araşdırmadır. Bu hesabat DİM-in rəsmi göstəricilərinə və ölkələrin könüllü təhlil proseslərinə bir əlavədir. Hesabatda rəsmi məlumat təminatçıları, tədqiqat mərkəzləri və qeyri-hökumət təşkilatları da daxil olmaqla digər təşkilatların dərc etdiyi açıq məlumatlardan istifadə edilib. O, Hökumətlərə və vətəndaş cəmiyyətinə fəaliyyət üçün prioritetləri müəyyən etməyə, icra ilə bağlı əsas problemləri anlamağa, irəliləyişi izləməyə, hesabatlılığı təmin etməyə və DİM-lərə nail olmaq üçün aradan qaldırılmalı olan boşluqları müəyyən etməyə yardımçı olur.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
