Azərbaycanda Mülki Müdafiə Fondunun yaradılması nəzərdə tutulur.
APA xəbər verir ki, bu barədə Fövqəladə Hallar Nazirliyinin (FHN) Mülki müdafiə işinin təşkili Baş idarəsinin rəisi, general-mayor Niyazi Zamanov “Mülki müdafiə üzrə əhalinin hazırlanmasında ali təhsil müəssisələrinin rolu, mülki müdafiə fənninin tədrisinin təkmilləşdirilməsi, mülki müdafiənin maddi-tədris bazasının gücləndirilməsi, mövcud problemlərin müzakirəsi və bununla əlaqədar nazirliklər arasında qarşılıqlı fəaliyyət” mövzusunda keçirilən elmi-praktiki konfransda məlumat verib.
O bildirib ki, fond mühafizə qurğuları, fərdi mühafizə vasitələri ilə təminat məsələsi, əhalinin xəbərdarlıq sistemi və s. məsələləri özündə əks etdirəcək: "Bütün bunlar qanunvericilikdə nəzərdə tutulub. Bu məsələnin həlli bu gün ölkədə ən prioritet istiqamətlərdəndir. Həmçinin Nazirlər Kabineti tərəfindən qaldırdığımız bütün məsələlərin həlli istiqamətində böyük tərkibdə komissiya yaradılıb".