“Artıq iki ildir biz pandemik həyat yaşayırıq və yeni həyat rejimi formalaşıb”.
APA-nın məlumatına görə, bunu Nazirlər Kabineti yanında Operativ Qərargahın brifinqində səhiyyə nazirinin birinci müavini, səhiyyə naziri vəzifəsini icra edən Teymur Musayev deyib.
Teymur Musayev bildirib ki, qarşıdan bayramlar gəlir: “Son iki həftədir ki, xarici medialarda COVID-19-a qarşı müalicədə istifadə olunacaq yeni dərmanların təqdimatı olub. Bu məsələ Azərbaycan səhiyyə orqanları tərəfindən diqqətlə izlənilir. Bəzi ölkələrdə artıq o dərmanlar qeydiyyatdan keçib. Bəzi ölkələr hətta o dərmanların tədarükünə də başlayıb. Yetərincə sübuta yetirilmiş elmi-tibbi sübutlar toplandıqdan sonra həmin dərmanların Azərbaycana gətirilməsi nəzərdən keçiriləcək. Son zamanlar yeni dərmanların təqdimatının olması onun vaksinasiyanın yerini tutacağı ilə bağlı fikir formalaşdırıb. Bu, yanlışdır”.