Azərbaycan Prezidenti İlham Əliyevin tapşırığına uyğun olaraq, Türkiyə Respublikasında baş vermiş güclü zəlzələnin fəsadlarının aradan qaldırılması və axtarış-xilasetmə əməliyyatlarına dəstək məqsədilə qardaş ölkəyə yollanan Fövqəladə Hallar Nazirliyinin (FHN) 420 nəfərlik şəxsi heyəti Adana şəhərinə çatıb.
APA-nın Türkiyəyə ezam olunan müxbiri xəbər verir ki, bu barədə jurnalistlərə açıqlamasında FHN-in Bakı Regional Mərkəzinin rəisi, general-mayor Məhərrəm Həsənov deyib.
O bildirib ki, FHN-in Adanaya çatmış çevik xilasetmə qüvvələrindən ibarət heyət zəlzələnin nəticələrinin aradan qaldırmaq üçün hadisə yerinə yola düşür: "Fəsadların aradan qaldırılmasında Azərbaycan xilasediciləri son ana qədər qardaş Türkiyənin yanında olacaq. Sona qədər fəaliyyət göstərəcəyik".