Heydər Əliyevin 100 illik yubileyinə həsr olunan “Dirçəliş. Başlanğıc” kitabının təqdimatı olub - FOTO

Heydər Əliyevin 100 illik yubileyinə həsr olunan “Dirçəliş. Başlanğıc” kitabının təqdimatı olub - FOTO
# 09 iyun 2023 19:52 (UTC +04:00)

Xarici İşlər Nazirliyi, “PAŞA Həyat Sığorta” Açıq Səhmdar Cəmiyyəti və “Azərbaycan Hava Yolları” Qapalı Səhmdar Cəmiyyətinin dəstəyi ilə hazırlanmış Ümummilli lider Heydər Əliyevin 100 illik yubileyinə həsr olunan “Dirçəliş. Başlanğıc” kitabının təqdimat mərasimi keçirilib.

APA xəbər verir ki, əvvəlcə Azərbaycan Respublikasının Dövlət Himni səsləndirilib.

Tədbiri giriş sözü ilə açan Azərbaycan Respublikası Prezidentinin Administrasiyasının Xarici siyasət məsələləri şöbəsinin sektor müdiri Həbib Mikayıllı 44 günlük Vətən Müharibəsində Ali Baş Komandan İlham Əliyevin rəhbərliyi ilə Ordumuzun qazandığı qələbədən və Qarabağa qayıdış barədə fikirlərini bölüşüb.

"Torpaqlarımız azad ediləndən sonra həmin yerlər yenidən qurulur. Azad edilən ərazilər ölkəmizin ərzaq təhlükəsizliyinə böyük töhfə verəcək. Laçın, Kəlbəcər, Şuşa kimi ərazilər turizm imkanlarımızın artmasına şərait yaradacaq".

PAŞA Həyat Sığorta”- ASC İdarə Heyətinin sədri Niyaz İsmayılov isə "Qarabağ" adlı kitabı ərsəyə gətirəndə torpaqlarımızın işğal altında olduğuna diqqət çəkib: "Biz əldə etdiyimiz şəkilləri çox çətinlik bahasına əldə etmişdik. Amma artıq bizim növbəti, bu silsilədən olan kitablarımızın nəşri zamanı torpaqlarımız Ali Baş Komandan və Ordumuzun sayəsində azad olunub.

Amma tarix unudulmamalıdır, tarixi faktlar daima əlimizdə olmalı, hər zaman diqqətdə saxlanılmalıdır. Bu kitablar da bir tarixi faktdır".

İRS və "Azerbaijan Airlines" jurnallarının baş redaktoru Musa Mərcanlı ilin sonuna kimi bu silsilədən olan daha 3 kitabın da nəşr olunacağını deyib: “Kitabın əsas məqsədi Şərqi Zəngəzur və Qarabağda iki il ərzində aparılan tikinti-quruculuq işlərini müfəssəl formada təqdim etməkdir. Sizə bir sirr açım, biz ilin əvvəlində həmin ərazilərə səfər zamanı quruculuq işlərinin o qədər sürətli getdiyini gördük ki, dedik, kaş bütün bunların hamısını kitaba daxil edə biləydik".

Kitabın şef redaktoru Andrey Vasilyev isə Azərbaycan haqqında 10 kitabın müəllifi olduğunu bildirib:

"Qarabağ gözlənilmədən tez bir zamanda azad olundu. Biz heç vaxt işğal dövründə orada törədilənləri təsəvvürümüzə gətirə bilməzdik. Biz kitab vasitəsilə Qarabağın tarixi və mədəniyyəti barədə məlumat vermək istədik".

“İRS” silsiləsi çərçivəsində sayca 21-ci olan “Dirçəliş. Başlanğıc” kitabı Ümummilli lider Heydər Əliyevin 100 illik yubileyinə həsr olunub. Kitabın məqsədi Qarabağın və Şərqi Zəngəzurun erməni işğalından azad olunmuş torpaqlarında iki il ərzində baş vermiş dəyişiklikləri maksimal dərəcədə tam təsvir etməkdən ibarətdir. Qeyd olunub ki, region dinc həyata qayıdır, avtomobil və dəmir yolları çəkilir, bərpa edilən və yenidən tikilən su elektrik stansiyaları fəaliyyət göstərir, yeni hava limanları reysləri qəbul edir, dağıdılmış şəhər və kəndlər dirçəldilir. Otuz ilə yaxın müddətdə öz doğma yurdlarından uzaqda yaşamış məcburi köçkünlər Vətənə qayıtmağa başlayır. Qarabağ və Şərqi Zəngəzur Azərbaycanın ən gözəl, ən qabaqcıl, ən firavan guşəsi olacaq.

Nəşr Azərbaycan Respublikası Xarici İşlər Nazirliyi, “PAŞA Həyat Sığorta” Açıq Səhmdar Cəmiyyəti və “Azərbaycan Hava Yolları” Qapalı Səhmdar Cəmiyyətinin dəstəyi ilə hazırlanıb. Kitab azərbaycan, rus, ingilis dillərində nəşr edilib.

“İRS” Nəşriyyat evi tərəfindən çap edilən kitab “Ön söz”, “Gələcəyə uzanan magistrallar”, “Quruculuq enerjisi”, “Hava limanları”, “Torpağa qayıdış”, “Kül içindən dirçələnlər” və “Doğma Şuşa” kimi hissələrdən ibarətdir.

#
#

ƏMƏLİYYAT İCRA OLUNUR