FHN sağlamlıq cəhətdən qüsurlu insanların fəlakət risklərinin azaldılmasına dair seminar keçirib

FHN sağlamlıq cəhətdən qüsurlu insanların fəlakət risklərinin azaldılmasına dair seminar keçirib
# 18 sentyabr 2019 18:19 (UTC +04:00)

Bu gün “Park İNN” otelində Azərbaycan Respublikasının Fövqəladə Hallar Nazirliyi (FHN) Avropa Şurasının Avropa və Aralıq Dənizi üzrə Böyük Risklər Sazişi (EUR-OPA), UNİCEF və Beynəlxalq Miqrasiya Təşkilatının Azərbaycan nümayəndəlikləri ilə birlikdə seminar keçirib.

FHN-dən APA-ya verilən məlumata görə, “Sağlamlıq cəhətdən qüsurlu insanların fəlakət risklərinin azaldılması tədbirlərinə daxil edilməsi” mövzusunda keçirilən seminarın əsas məqsədi beynəlxalq tərəfdaşları, dövlət qurumlarını, maraqlı tərəfləri, vətəndaş cəmiyyətinin və yerli QHT-lərin nümayəndələrini və fəlakətlər zamanı insan hüquqlarının müdafiəsi, təşviqi və sağlamlıq cəhətdən qüsurlu insanlara inklüziv yanaşma üzrə öncül təcrübələr sahəsində spesifik təcrübə və biliyə malik ölkələrin ekspertlərini bir araya gətirməkdir.

Tədbiri Azərbaycan Respublikasının Fövqəladə Hallar nazirinin müavini general-leytenant Etibar Mirzəyev açaraq iştirakçıların nəzərinə çatdırıb ki, seminar EUR-OPA Böyük Risklər Sazişinin və bu istiqamətdə həyata keçirilən digər beynəlxalq və milli tədbirlərin nəticələrini təqdim etmək, sağlamlıq cəhətdən qüsurlu insanların ehtiyaclarını və sağlamlıq imkanı məhdud şəxslərin, miqrantların, məcburi köçkünlərin, qaçqınların və uşaqların qarşılaşdığı çətinlikləri müəyyən etmək üçün bir imkan olacaq.

Avropa Şurasının Avropa və Aralıq Dənizi üzrə Böyük Risklər Sazişinin icraçı katibi Canluka Silvestrini, UNİCEF-in Azərbaycandakı Nümayəndeliyinin rəhbəri Edvard Karvardin, Beynəlxalq Miqrasiya Təşkilatının Azərbaycan Nümayəndəliyinin rəhbəri Vladimir Qriqoriyev seminarın təşkilinə görə təşəkkürlərini bildirib və tədbirin əhəmiyyətindən danışıblar.

Paralimpiyaçı idmançı Zinyət Vəliyeva tədbirin mühüm əhəmiyyət kəsb etdiyini qeyd edərək, sağlamlıq imkanı məhdud şəxslərin problemlərinin həlli istiqamətində dövlətimiz tərəfindən həyata keçirilən mühüm layihələrin önəmini vurğulayıb.

Seminarda “Azərbaycanda sağlamlıq cəhətdən qüsurlu insanların təhlükələrdən qorunması sahəsindəki cari vəziyyətin təhlili”, “Sağlamlıq cəhətdən qüsurlu insanlara təhlükələrdən qoruması üzrə beynəlxalq öncül təcrübələr, layihələr və alətlər” mövzusunda məruzələr dinlənilib, həssas qrupların təhlükələrdən qorunması üzrə Azərbaycana ən uyğun ssenariyə dair fikir mübadiləsi aparılıb.

Seminara sentyabrın 19-da yekun vurulacaq.

#
#

ƏMƏLİYYAT İCRA OLUNUR