44 namizəd Ədliyyə Akademiyasında uzunmüddətli tədris kursuna cəlb olunub

44 namizəd Ədliyyə Akademiyasında uzunmüddətli tədris kursuna cəlb olunub
  • Clock-gray 18:57
  • calendar-gray 22 İyul 2020

Prezident İlham Əliyevin məhkəmə-hüquq islahatlarının dərinləşdirilməsinə dair 2019-cu il 3 aprel tarixli Fərmanı ilə əlavə ayrılmış hakim ştatlarının yüksək hazırlıqlı hüquqşünaslar hesabına komplektləşdirilməsi ilə bağlı ardıcıl tədbirlər görülür, bu məqsədlə hakimlərin şəffaf seçimi aparılır.

Ədliyyə Akademiyasından APA-ya verilən məlumata görə, növbəti seçim zamanı uğur qazanmış 44 nəfər namizəd Ədliyyə Akademiyasında uzunmüddətli tədris kursuna cəlb olunub. Kurs zamanı onların, həmçinin beynəlxalq təcrübəni öyrənmələrinə xüsusi diqqət yetirilir.

Azərbaycan və Türkiyə Ədliyyə akademiyaları arasında səmərəli əməkdaşlıq münasibətləri qurularaq ötən dövrdə Türkiyə tərəfinin dəstəyi ilə 300-ə yaxın azərbaycanlı hakimliyə namizəd qardaş ölkədə nəzəri və praktiki təlim keçiblər.

COVİD-19 qlobal pandemiyası ilə əlaqədar xüsusi karantin rejiminin tətbiqi nəzərə alınaraq iki ölkənin Ədliyyə akademiyaları tərəfindən hazırda tədris kursu keçən namizədlər üçün 16-22 iyul tarixlərində videokonfrans formatında distant təlim kursu təşkil olunub.

Təlimin açılışında Türkiyə Ədliyyə Akademiyasının rektoru Muhittin Özdemir və Azərbaycan Ədliyyə Akademiyasının rektor əvəzi Elçin Xələfov çıxış edərək, iki ölkə arasında qədim tarixə söykənən dostluq və qardaşlıq əlaqələrinin bütün sahələrdə inkişafı, ölkələrimizin başçılarının ikitərəfli əməkdaşlığın möhkəmlənməsində güclü siyasi iradəsi qeyd olunub, dövlətlərimizin hər zaman bir-birinə dəstək göstərdiyi, bu ərəfədə Ermənistan-Azərbaycan dövlət sərhədinin Tovuz istiqamətində Ermənistanın törətdiyi hərbi təxribat zamanı Türkiyənin Azərbaycana dəstəyi xüsusilə vurğulanıb.

Təlimdə hakimliyə namizədlərə Türkiyə Ədalət Akademiyasının fəaliyyətinə dair təqdimat nümayiş etdirilib, Türkiyə məhkəmə sistemi və ixtisaslaşdırılmış məhkəmələrin mühakimə prosedurları, UYAP-SEGBİS (Türkiyə milli elektron məhkəmə və ədliyyə məlumat sistemi, səs və video informasiya sistemi), elektron bildiriş, icra qurumlarında elektron tədbirlərin tətbiqi və icra icraatı sistemi, mediasiya, korrupsiya cinayətləri barədə məlumat verilib.

Günay Elşadqızı

Digər xəbərlər