Dövlət Komitəsi: Zorakılıq halları ilə bağlı xəbərlər bizi narahat edir

Dövlət Komitəsi: Zorakılıq halları ilə bağlı xəbərlər bizi narahat edir
# 08 aprel 2020 10:45 (UTC +04:00)

"Hazırkı vəziyyətdə gender bərabərliyi baxımından qadınlar daha həssas durumdadırlar. Hazırda dünya üzrə səhiyyə və sosial xidmət işçilərinin 70 %-ni, Azərbaycanda isə 77,6%-ni qadınlar təşkil edir. Bu qadınlar karantin rejiminə baxmayaraq, iş fəaliyyətini davam etdirirlər".

Bu barədə APA-ya Ailə,Qadın və Uşaq Problemləri üzrə Dövlət Komitəsindən bildirilib.

Məlumatda qeyd olunub ki, digər tərəfdən onların ailə-məişət zəminində iş yükü daha da artıb: "O zaman ailə üzvləri bir-birinə qarşı anlayışla, hörmətlə yanaşmalı, tolerantlıq nümayiş etdirməlidirlər. Əlbəttə ki, bunun üçün bir neçə məsələni nəzərdən keçirmək lazımdır: birincisi, ailədə qadın və kişinin rol və vəzifə bölgüsü olmalıdır ki, qadın da özünü bir şəxsiyyət kimi formalaşdıra bilsin. Kişi yalnız ailəni iqtisadi cəhətdən təmin edən bir şəxs deyil, onun ər və ata kimi sosial vəzifə və öhdəlikləri var. Bu həm də sosial və mənəvi məsuliyyət hissinin bölüşdürülməsidir. Nəzərə alsaq ki, bu müddətdə kişilər müvəqqəti olaraq işləmirlər. Və ya həm qadın, həm də kişi işləmir. Onda ev işlərini görməkdə və uşaqlara dərslərini oxumaqda, ev tapşırıqlarını həll etməkdə, birgə vaxt keçirməkdə plan hazırlansa, daha yaxşı olar. Mühüm məsələlərdən biri də patriarxal mədəniyyət və tərbiyənin və yalnış stereotiplərin təsirindən yaranan “kişi hər zaman haqlıdır”, “onun istəyi əsasdır”, “kişiyə olar, qadına olmaz” və s. bu kimi birtərəfli və səhv yanaşmaların mövcudluğudur ki, bu da gender əsaslı zorakılıq halların baş verməsinə gətirib çıxarır".

Komitədən bildirilib ki, Azərbaycanda hələ ki, dünya ölkələrində olduğu kimi, zorakılıqla bağlı böyük statistik göstəricilər qeydə alınmayıb: "Lakin KİV-də ailə-məişət zəminində baş verən zorakılıq halları haqqında xəbərlər, sosial şəbəkələrdə yayılan məlumatlar, eyni zamanda, Komitəyə edilən müraciətlər, apardığımız müşahidələr bizi narahat edir. Təəssüflər olsun ki, bu gün dünyada gedən bu neqativ tendensiya ölkəmizdə də sezilməkdədir".

Bildirilib ki, sosial təcrid dövründə məişət zorakılığına və ya gender əsaslı zorakılığa məruz qalmış insanların hüquqlarının müdafiəsi ilə bağlı iş aparılır: "Davamlı olaraq İcra Hakimiyyətləri yanında fəaliyyət göstərən Monitorinq Qrupları, müvafiq hüquq-mühafizə orqanları, zorakılığa məruz qalan qadın və uşaqlara sığnacaq verən qeyri-hökumət təşkilatları ilə əlaqəli şəkildə fəaliyyət davam etdirilir və faktlar üzrə operativ iş aparılır. Ailələrə məsləhətimiz bundan ibarətdir ki, bu həssas durumda daha dözümlü olsunlar, bir-birilərinin qədrini bilsinlər. Hazırkı situasiya bu xüsusiyyətlərin daha da inkişaf etdirilməsini tələb edir".

#
#

ƏMƏLİYYAT İCRA OLUNUR