Fərdi Reabilitasiya Proqramı əlilliyi olan şəxslərin peşə-əmək qabiliyyətinin qismən bərpasını təmin edəcək

Fərdi Reabilitasiya Proqramı əlilliyi olan şəxslərin peşə-əmək qabiliyyətinin qismən bərpasını təmin edəcək
  • Clock-gray 21:18
  • calendar-gray 05 Yanvar 2021

Fərdi Reabilitasiya Proqramı əlilliyi olan şəxsin tibbi, peşə-əmək, psixoloji-pedoqoji reabilitasiyası və sosial bacarıqların inkişafı ilə əlaqədar kompleks tədbirləri özündə əks etdirir. 

APA-nın məlumatına görə, bu Nazirlər Kabinetinin müvafiq qərara verdiyi izahda qeyd edilib. 

İzahda bildirilib ki, Fərdi Reabilitasiya Proqramı hazırlanarkən müvafiq tədbirlərin həyata keçirilməsinə dair icraçı kimi müəyyən olunmuş dövlət orqanları və dövlətə məxsus hüquqi şəxslər Fərdi Reabilitasiya Proqramının icrasını təmin etməlidirlər.

Əlilliyin müəyyən edilməsi tarixindən 10 iş günü müddətində Fərdi proqramın hazırlanması üçün vaxt həmçinin yer barədə müəyyən edilir və  2 iş günü ərzində tərtib edilir. Əlilliyi olan şəxs Fərdi proqramın hazırlanmasında iştirak edə bilməyəcəyi barədə TSEK-i məlumatlandırdıqda, Fərdi proqram onun yaşadığı yerdə hazırlanır.

TSEK əlilliyi olan şəxsin tibbi, peşə-əmək, psixoloji-pedaqoji, ətraf mühit amillərinin, həyat fəaliyyətinin, mənzil-məişət şəraitinin kompleks qiymətləndirilməsini həyata keçirir, əmək fəaliyyətinə başlama və ya davametmə, eləcə də reabilitasiya potensialını dəyərləndirir, reabilitasiya nəticələrinin proqnozlaşdırılmasını, əlilliyi olan şəxsin itirilmiş funksiyalarının bərpasına yönəldilən reabilitasiya vasitələrini və xidmətini, o cümlədən sanatoriya-kurort müalicəsini müəyyənləşdirir. Bu zaman əlilliyi olan şəxsin ictimai və peşə fəaliyyəti, təhsili, maraq dairəsi və sosial statusu nəzərə alınır.

Fərdi proqram əlilliyin müəyyən edildiyi müddətə tərtib olunur. TSEK hər bir reabilitasiya tədbirinin həyata keçirilməsi müddətlərini Fərdi proqramın müddətindən çox olmamaqla müəyyən edir.

Fərdi proqram hazırlanan zaman əlilliyi olan şəxsin və (və ya) onun qanuni nümayəndəsinin fikirləri nəzərə alınır.

Fərdi proqramla müəyyən edilmiş tədbirlərin effektivliyinin və ya hər hansı əlavə və dəyişikliklərin zəruriliyinin müəyyən olunması məqsədilə əlilliyi olan şəxslərə münasibətdə ildə bir dəfə, sağlamlıq imkanları məhdud 18 yaşınadək uşaqlara münasibətdə isə altı ayda bir dəfə TSEK tərəfindən aidiyyəti üzrə tədbirlərə yenidən baxılır.

Layihədə Fərdi Reabilitasiya Proqramının həyata keçirilməsi əlilliyi olan şəxslərin fiziki, əqli, məişət, sosial və peşə-əmək qabiliyyətinin tamamilə və ya qismən bərpasını təmin edəcək.

Firuzə Vahid

Digər xəbərlər