Koronavirus təhlükəsi ilə əlaqədar Biləsuvar gömrük-sərhəd keçid məntəqəsi yaxınlığında 100 çadır qurulub

Koronavirus təhlükəsi ilə əlaqədar Biləsuvar gömrük-sərhəd keçid məntəqəsi yaxınlığında 100 çadır qurulub
  • Clock-gray 17:11
  • calendar-gray 28 Fevral 2020

Biləsuvar rayonunda Fövqəladə Hallar Nazirliyinin ikinci mərhələ qəbul çeşidləmə məntəqəsi fəaliyyətə başlayıb.

APA-nın cənub bürosunun verdiyi məlumata görə, bu məqsədlə Biləsuvar gömrük-sərhəd keçid məntəqəsinin yaxınlığında 500 nəfərin yerləşdirilə biləcəyi 100 çadır qurulub.

FHN-nin Mülki Müdafiə Qoşunlarının Tibb Xidməti rəisi Elçin Əligülov APA-ya bildirib ki, sərhədi keçən bütün insanların ilkin müayinə çeşidlənməsi elə gömrük buraxılış məntəqəsində təşkil olunur.

Orada aşkar olunmuş şübhəlilər müvafiq tibbi müəssisələrə göndərilir: “Digərləri isə ikinci mərhələ qəbul çeşidləmə məntəqəsində çadırlarda yerləşdirilir və müayinə prosesi 6 nəfərdən ibarət həkim briqadası tərəfindən həyata keçirilir”.

E. Əligülovun sözlərinə görə, məntəqədə ilkin tibbi müayinə üçün bütün imkanlar var: “Burada da virusa yoluxmuş şübhəli şəxslər aşkarlanarsa, regionda yerləşən müvafiq tibb müəssisələrinə göndəriləcək”.

E. Əligülov bildirib ki, qurulmuş şəhərcikdə sanitar-epidemioloji vəziyyətə Gigiyena və Epidemiologiya Mərkəzi, FHN-nin Muğan Regional Mərkəzi tərəfindən nəzarət olunur: “Fövqəladə Hallar Nazirliyinin 100 nəfərdən artıq şəxsi heyəti prosesə cəlb olunub. Məntəqələr su, istilik, elektriklə təchiz edilib. Məntəqələrin mətbəxi, sanitar qovşağı, hamamı var”.

Qeyd edək ki, analoji şəhərcik Astara gömrük-sərhəd keçid məntəqəsinin yaxınlığında da yaradılıb.

Tural Kərimov

Digər xəbərlər

Arxiv

date