MM-də işğaldan azad edilmiş ərazilərdə ekoloji vəziyyətlə bağlı konfrans keçirilib - YENİLƏNİB

MM-də işğaldan azad edilmiş ərazilərdə ekoloji vəziyyətlə bağlı konfrans keçirilib - YENİLƏNİB
  • Clock-gray 18:14
  • calendar-gray 10 Fevral 2021

Fevralın 10-da Milli Məclisin Təbii ehtiyatlar, energetika və ekologiya komitəsinin təşəbbüsü ilə “Vətən müharibəsindən sonra işğaldan azad edilmiş ərazilərdə ekoloji vəziyyət, perspektiv layihələr və innovativ Qarabağ” mövzusunda onlayn konfrans keçirilib.

MM-in Mətbuat və ictimaiyyətlə əlaqələr şöbəsindən APA-ya verilən məlumata görə, Milli Məclisin Təbii ehtiyatlar, energetika və ekologiya komitəsinin sədri Sadiq Qurbanov bildirib ki, konfrans çox aktual mövzuya həsr olunub.

Komitə sədri diqqətə çatdırıb ki, Azərbaycan Prezidenti, Ali Baş Komandan İlham Əliyevin rəhbərliyi ilə rəşadətli Ordumuz 44 günlük Vətən müharibəsi nəticəsində 30 ilə yaxın işğal altında olan torpaqlarımızı azad etdi, ölkəmizin ərazi bütövlüyü təmin olundu. Hazırda işğaldan azad edilmiş torpaqların yenidən qurulması və bərpa işləri qarşımızda dayanan ən mühüm məsələlərdən biridir.

Sadiq Qurbanov diqqətə çatdırıb ki, XXI əsrin əsas çağırışlarından biri ekoloji tarazlığın təmin edilməsidir. Buraya təbii resursların intensiv istismarının, neft-qaz və kömür hasilatının məhdudlaşdırılması, bərpa olunan enerji növlərinə, yaşıl və mavi iqtisadiyyata üstünlük verilməsi, su ehtiyatlarının səmərəli istifadəsi, karbon qazının həcminin azaldılması, təkrar emal və digər məsələlər daxildir.

Sonra onlayn konfransda çıxış edən ekologiya və təbii sərvətlər naziri Muxtar Babayev, energetika nazirinin müavini Samir Vəliyev, iqtisadiyyat nazirinin müavini Elnur Əliyev, Azərbaycan Dövlət İqtisad Universitetinin rektoru Ədalət Muradov, kənd təsərrüfatı nazirinin müavini İlhamə Qədimova, Kiçik və Orta Sahibkarlığın İnkişafı Agentliyinin icraçı direktoru Orxan Məmmədov, Qarabağ Dirçəliş Fondunun İdarə Heyətinin sədri Rəhman Hacıyev, Milli Məclisin İqtisadi siyasət, sənaye və sahibkarlıq komitəsinin sədri Tahir Mirkişili qarşıda dayanan vəzifələrlə bağlı fikirlərini bildiriblər.

Tədbirdə işğaldan azad edilmiş ərazilərə qayıdış, ətraf mühitin qorunması və enerji təminatı, sahibkarların quruculuq işlərinə cəlb olunması, işğaldan azad edilmiş ərazilərdə dövlət-özəl sektor əməkdaşlığının perspektivləri,  bölgədə kənd təsərrüfatının inkişafı və digər məsələlər geniş müzakirə olunub.

Onlayn konfransa yekun vuran Milli Məclisin Təbii ehtiyatlar, energetika və ekologiya komitəsinin sədri Sadiq Qurbanov konfransın səmərəli keçdiyinə, səslənən fikir və təkliflərin faydalı olacağına əminliyini ifadə edib.

 

***

16:06

Bu gün Milli Məclisin Təbii ehtiyatlar, energetika və ekologiya komitəsinin təşəbbüsü ilə “Vətən müharibəsindən sonra işğaldan azad edilmiş ərazilərdə ekoloji vəziyyət, perspektiv layihələr və İnnovativ Qarabağ” mövzusunda onlayn konfrans keçirilib.

Komitənin üzvü Fatma Yıldırım APA-ya bildirib ki, Komitə sədri Sadiq Qurbanov konfransda giriş sözü ilə çıxış edib, daha sonra ekologiya və təbii sərvətlər naziri Muxtar Babayev, energetika nazirinin müavini Samir Vəliyev, iqtisadiyyat nazirinin müavini Elnur Əliyev, Azərbaycan Dövlət İqtisad Universitetinin rektoru Ədalət Muradov, kənd təsərrufatı nazirinin müavini İlhamə Qədimova, Kiçik və Orta Sahibkarlığın İnkişafı Agentliyinin icraçı direktoru Orxan Məmmədov, Qarabağ Dirçəliş Fondunun İdarə Heyətinin sədri Rəhman Hacıyev və Milli Məclisin İqtisadi siyasət, sənaye və sahibkarlıq komitəsinin sədri Tahir Mirkişili qarşıda dayanan vəzifələrlə bağlı fikirlərini bildiriblər.

Konfransda işğaldan azad edilmiş ərazilərə qayıdış, ətraf mühitin qorunması və enerji təminatı, sahibkarların quruculuq işlərinə cəlb olunması, işğaldan azad edilmiş ərazilərdə dövlət-özəl əməkdaşlığının perspektivləri,  bölgədə kənd təsərrüfatının inkişafı və digər məsələlər geniş müzakirə olunub.

Firuzə Vahid

Digər xəbərlər