Notariat Palatası İdarə Heyətinin sədri: “Əvvəllər daşınmaz əmlakla bağlı alqı-satqı müqavilələrində tez-tez mübahisələr yaranırdı”

Notariat Palatası İdarə Heyətinin sədri: “Əvvəllər daşınmaz əmlakla bağlı alqı-satqı müqavilələrində tez-tez mübahisələr yaranırdı”
  • Clock-gray 11:41
  • calendar-gray 21 Avqust 2020

 

“Daşınmaz əmlakla bağlı alqı-satqı müqavilələrində tərəflər bəzən müqavilə qiymətini fərqli şəkildə göstərmək istəyirlər”.

APA-nın məlumatına görə, bunu Notariat Palatası İdarə Heyətinin sədri, 2 saylı Bakı “ASAN xidmət” mərkəzində xüsusi notariusu Hüseyn Məmmədov deyib. O bildirib ki, əmlak qiymətinin düzgün qeyd olunması, onlar üçün əlavə məsrəflərə yol açmır: “Müəyyən olunmuş rüsum eyni şəkildə qalır. Ancaq vətəndaşlar müqavilədə əmlakın qiymətini reallıqdan fərqli şəkildə yazarsa, məsələn, əmlakın qiyməti 100 min manatdırsa, 70-80 min manat qeyd ediblərsə, gələcəkdə müqavilə ilə bağlı hər hansı mübahisələr yarananda yazdıqları məbləğə istinad edə biləcəklər ki, bu da satıcı tərəfin hüquqlarının əhəmiyyətli dərəcədə pozulması və onun ziyan çəkməsinə səbəb olacaq”.

Onun sözlərinə görə, depozit hesabının tətbiq olunmadığı əvvəlki illərdə bu müqavilələr üzrə məbləğin alınaması barədə tərəflər arasında tez-tez mübahisələr yaranırdı: “Tərəflər pul vəsaitinin tam və yaxud qismən verilmədiyi barədə iddialar irəli sürürdülər. Bunun qarşısını alamq üçün Nazirlər Kabinetinin qərarına əsasən, bu vəsaitin depozit hesabı vasitəsilə ödənilməsi məsələsi gündəmə gəldi. Bundan sonra bu kateqoriyadan olan mübahisələrə demək olar ki, rast gəlmirik”.

H. Məmədov onu da deyib ki, Mülki Məcəllənin tələblərinə görə, bağışlanan əmlak əvəzsiz müqavilədir. Onun sözlərinə görə, bağışlama müqaviləsi əvəzsiz olaraq istənilən fəaliyyətli şəxs öz əmlakı üzərində sərəncam verə bilər, yəni əmlakını digər şəxsə bağışlaya bilər: “Bağışlanan əmlakın geri alınması mübahisə halında əsas verən hüquqi amillərin hər hansı birinin etibarsız olması lazımdır. Yəni, burada iradə faktoru, mülkiyyətin qanuniliyi, yəni, mülkiyyət həmin şəxsə məxsusdursa və həmin şəxs şüurlu şəkildə, öz iradəsini düzgün ifadə edirsə, fəaliyyət qabiliyyətində hər hansı məhdudlaşma yoxdursa, öz əmlaknı əvəzsiz olaraq digər şəxsə bağışlaya bilər. Bu, geri qaytarılmanı nəzərdə tutmur”.

Əsmər Qabil

Digər xəbərlər