Sosial

Ana səhifə

Sosial

Azərbaycan-Yaponiya ekspedisiyası Damcılıda tədqiqatları davam etdirir

23 iyul 2019 11:46 (UTC +04:00)

Qazax rayonundakı “Avey” Dövlət Tarix-Mədəniyyət Qoruğu ərazisində, Daşsalahlı kəndi yaxınlığında yerləşən Damcılı mağara düşərgəsində Azərbaycan-Yaponiya beynəlxalq arxeoloji ekspedisiyası tədqiqatlar aparır.

Mədəniyyət Nazirliyi yanında Mədəni İrsin Qorunması, İnkişafə və Bərpası üzrə Dövlət Xidmətindən APA-ya verilən məlumata görə, 2015-ci ildə Nazirliyin təşəbbüsü ilə Yaponiyanın Tokio Universitetinin Daş dövrü mütəxəssisi, professor Yoşihiro Nişiakinin rəhbərliyi ilə qoruq ərazisində kəşfiyyat xarakterli axtarışlar aparmaq üçün heyət dəvət olunub.

2016-cı ildə Damcılı mağara düşərgəsində arxeoloji qazıntılar başlanıb.

Bu ilin iyulun 16-dan beynəlxalq ekspedisiya Damcılı mağara düşərgəsində növbəti qazıntı işlərinə start verib.

Ekspedisiyanın tərkibində Tokio Universitetinin professoru Yoşihiro Nişiakinin başçılığı ilə Qədim Şərq Muzeyinin, Yapon Elmin İnkişafı Cəmiyyətinin, Vaseda Universitetinin, Kanazava Universitetinin və digər elmi mərkəzlərin arxeologiya, paleobotanika, paleobiologiya, topoqrafika və başqa sahələr üzrə mütəxəssisləri iştirak edir.

Tədqiqat işlərinə yaponiyalı mütəxəssislərlə yanaşı Azərbaycan Milli Elmlər Akademiyası (AMEA) Arxeologiya və Etnoqrafiya İnstitutunun əməkdaşları da cəlb ediliblər.

Aparılan tədqiqatlar nəticəsində ərazidə Tunc, Neolit, Mezolit və Orta Paleolit dövrlərinə aid təbəqələr aşkar olunub. Beynəlxalq ekspedisiya qoruq ərazisində işlədiyi illərdə müxtəlif dövrlərə aid alətlər, heyvan sümükləri, bitki toxumları, dövrü tam bəlli olmayan bir neçə qutu qəbir aşkar ediblər.

2018-ci ildə isə mezolit dövrünə aid daha yüksək elmi nəticələr əldə olunub. Bu ildən etibarən qazıntı işləri 3 metrə qədər genişləndirilərək qayaların alt tərəfində aparılmağa başlanılıb.

Damcılıda olan Palelolit düşərgələri qapalı paleolit düşərgələridir, indiyə qədər bu ərazilərdə bu qədər uzun müddətli və ardıcıl elmi-tədqiqat işləri aparılmayıb.

Azərbaycanda ilk Qədim Daş dövrünə aid abidə – Damcılı mağarası 65 il əvvəl aşkarlanıb. 1956-1957-ci illərdə burada aparılan tədqiqatlar zamanı Orta Paleolit (Mustye mədəniyyəti), Üst paleolit, Mezolit, Neolit və Orta əsrlərə aid materiallar aşkar olunub.