2021-ci ildə keçiriləcək kişi və qadın voleybolçular arasında Avropa çempionatının final mərhələsinə birbaşa vəsiqə qazanan komandaların siyahısı açıqlanıb.
Apasport.az saytının məlumatına görə, hər iki yarışın 12 iştirakçısı dəqiqləşib.
Bunlardan 4-ü meydan sahibi olan ölkələrin yığmalarıdırsa, 2019-cu ildəki Avropa çempionatının ən yaxşı 8 komandası da seçmə mərhələdən azaddır.
Qadınlardan ibarət Azərbaycan millisi də final mərhələsinə birbaşa qatılmaq hüququna yiyələnib. Düzdür, yığmamız son qitə çempionatında ilk “səkkizliy”ə düşməyərək 10-cu yerlə kifayətlənib.
Amma millimizi qabaqlayan 9 ölkədən ikisi ev sahibləri sırasında olduğundan Azərbaycan voleybolçuları sonuncu – 8-ci vəsiqəyə yiyələniblər. Yığmamızın AVRO-2021-ə yolunu son qitə çempionu Serbiya və 8-ci yerin sahibi Bolqarıstan açıb.
Ümumilikdə isə qadınların çempionatına 12 vəsiqəni aşağıdakı komandalar əldə edib: Serbiya (meydan sahibi, son çempionatda 1-ci yer), Bolqarıstan (meydan sahibi, 8-ci yer), Xorvatiya (meydan sahibi, 11-ci yer), Rumıniya (meydan sahibi, 13-cü yer), Türkiyə (2-ci yer), İtaliya (3-cü yer), Polşa (4-cü yer), Niderland (5-ci yer), Almaniya (6-cı yer), Rusiya (7-ci yer), Belçika (9-cu yer), Azərbaycan (10-cu yer).
Kişilərin analoji yarışına birbaşa vəsiqələri isə bu 12 komanda qazanıb: Polşa (meydan sahibi, 3-cü yer), Çexiya (meydan sahibi, 13-cü yer), Finlandiya (meydan sahibi, 14-cü yer), Estoniya (meydan sahibi, 24-cü yer), Serbiya (1-ci yer), Sloveniya (2-ci yer), Fransa (4-cü yer), Rusiya (5-ci yer), İtaliya (6-cı yer), Ukrayna (7-ci yer), Almaniya (8-ci yer), Belçika (9-cu yer).
Qeyd edək ki, final mərhələsində ümumilikdə 24 komanda mübarizə aparacaq. Digər 12 yığma seçmə mərhələdə müəyyənləşəcək.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
