Azərbaycan XİN: "Yeni Cənubi Uelsin baş nazirinin Ermənistanda etdiyi bəyanatlar hökumətin mövqeyi ilə ziddiyyət təşkil edir"

Azərbaycan XİN: "Yeni Cənubi Uelsin baş nazirinin Ermənistanda etdiyi bəyanatlar hökumətin mövqeyi ilə ziddiyyət təşkil edir"
# 19 iyul 2019 23:05 (UTC +04:00)

Xarici İşlər Nazirliyinin mətbuat katibi Leyla Abdullayeva Avstraliyanın Yeni Cənubi Uels ştatının erməni əsilli baş naziri, Gladis Berejiklianın Yerevana etdiyi şəxsi səfəri zamanı dövlətin bəzi rəsmiləri ilə görüşlər keçirməsi və yerli KİV-ə verdiyi müsahibələrdə Dağlıq Qarabağ məsələsinə münasbət bildirərkən guya Yeni Cənubi Uelsin 20 ildir ki, Dağlıq Qarabağın müstəqilliyini tanıdığını bildirməsi məsələsinə aydınlıq gətirib.

XİN rəsmisi APA-ya bildirib ki, ölkəmizin hazırda Ermənistan silahlı qüvvələrinin hərbi işğalı altında olan Dağlıq Qarabağ bölgəsi və burada yaradılmış qondarma separatçı rejim dünyanın heç bir suveren dövləti, hətta işğalçı Ermənistan tərəfindən belə tanınmır.

“O ki qaldı Avstraliyanın rəsmi mövqeyinə, vurğulamaq istərdim ki, Avstraliya Azərbaycanın suverenliyini və ərazi bütövlüyünü birmənalı şəkildə tanıyır və bu barədə ölkə rəsmiləri dəfələrlə bəyanatlarında, eləcə də Azərbaycana ünvanlanmış rəsmi məktub və notalarında qeyd ediblər. Avstraliyanın sabiq Xarici İşlər naziri 2015-ci ildə Avstraliyanın Azərbaycanın suverenliyi və ərazi bütövlüyünü dəstklədiyini və Dağlıq Qarabağın işğalına son verilməsinin tərəfdarı olduğunu bəyan etmişdi”, - L.Abdullayeva belə deyib.

Onun sözlərinə görə, 2017-ci ildə Avstraliyanın Beynəlxalq İnkişaf və Sakit okean üzrə naziri ölkəmizə səfəri çərçivəsində Avstraliyanın məlum mövqeyini birmənalı şəkildə ifadə etmişdi.

“Ən son bu yaxınlarda, cari ilin 29 may tarixində Avstraliya İttifaqının General-Qubernatoru Piter Kosqovun Azərbaycan Respublikasının Prezidentinə ünvanladığı məktubunda ölkənin Azərbaycanın suverenliyi və ərazi bütövlüyünə münasibətdə nümayiş etdirdiyi qəti dəstək mövqeyi öz əksini tapıb. Avstraliyanın Yeni Cənubi Uels ştatının erməni əsilli baş nazirinin söylədiklərinə gəldikdə isə, onun fikirlərinin Avstraliya Federal Hökumətinin rəyini əks etdirmədiyini vurğulamaq və ümumiyyətlə, federal hökumətin xarici siyasətinin formlaşdırılmasında ştat rəsmilərinin nə dərəcədə iştirak etdiklərini sual altına almaq istərdim. Yeni Cənubi Uelsin baş nazirinin Ermənistanda etdiyi bəyanatlar açıq şəkildə federal hökumətin rəsmi mövqeyi ilə ziddiyyət təşkil edir və fikrimizcə, bu xüsusda ştat rəsmisinə təmsil etdiyi dövlətin xarici siyasət kursuna uyğun davranması ilə bağlı xəbərdarlıq edilməlidir”- deyə XİN rəsmisi əlavə edib.

L.Abdullayeva onu da xatırladıb ki, erməni əsilli ştat rəsmisi hələ 2013-cü ildə bu ölkənin nəqliyyat naziri qismində ölkəmizin işğal olunmuş Dağlıq Qarabağ bölgəsinə icazəsiz səfər etdiyi üçün Azərbaycana girişi arzu olunmayan şəxslər siyahısına daxil edilib.

Ümumiyyətlə, Avstraliyadakı erməni lobbi qrupları son zamanlar Azərbaycanla Avstraliya arasında inkişaf etməkdə olan ikitərəfli münasibətlərdən narahatdırlar və bu münasibətlərin korlanmasına yönəlik addımlar atmağa cəhd edirlər: “Lakin vurğulamaq istərdim ki, bu qrupların əsassız fəaliyyəti Azərbaycanla Avstraliya arasında inkişaf etməkdə olan münasibətlərə xələl gətirə bilməyəcək”.

#
#

ƏMƏLİYYAT İCRA OLUNUR