Bəhruz Məhərrəmov: “Mediasında anti-Azərbaycan yayımları İranın öz imicinə zərbədir”

Bəhruz Məhərrəmov: “Mediasında anti-Azərbaycan yayımları İranın öz imicinə zərbədir”
# 13 avqust 2022 17:53 (UTC +04:00)

“İranda media strukturlarının anti-Azərbaycan yayımları ölkələrimiz arasında mehriban qonşuluq münasibətlərinə ziddir və eyni zamanda İranın özünün imicinə zərbədir”.

Bunu APA-ya açıqlamasında İran Dövlət Televiziyasında Azərbaycan əleyhinə təxribat xarakterli süjetə münasibət bildirən Milli Məclisin deputatı Bəhruz Məhərrəmov bildirib.

Bəhruz Məhərrəmov deyib ki, onlar beynəlxalq hüquq prinsiplərinə hörmət etməsə belə, ortaq mədəni tarixi dəyərlərə malik olduğu müsəlman qonşusuna münasibətdə həssas olmağa borcludur: “Çünki Azərbaycan həmişə İrana qarşı səmimi davranıb, ərazimizdən İrana qarşı 3-cü qüvvələrin istifadəsinə imkan verməyib, o cümlədən ölkəmiz İranın Avropaya və Şimala etibarlı çıxış qapısıdır. Azərbaycandakı "məzlum şiələrin müdafiəsinə" qalxan İran təbliğat maşını unutmamalıdır ki, Azərbaycanın son bir neçə əsrdə bölgənin hərbi zəfəri olan yeganə dövlətidir. Azərbaycanın bu qələbəsinin kökündə isə milli vəhdət dayanıb. Prezident İlham Əliyevin nail olduğu bu birlik İranın müttəfiqi olan Ermənistanın islam abidələrinə qarşı 30 illik vandalizminə, məscidlərin donuz damına çevrilməsinə, Məhəmməd ümmətinin qəbirlərinin dağıdılmasına, o cümlədən işğala və təcavüzə son qoyub. Kaş ki, İran mediası şiə təəssübkeşliyini bu məsələlərdə ortaya qoyaydı. Amma nədənsə İslam dövlətinin mediası daha çox erməni-qriqoryan kilsəsi, jurnalistləri isə təcavüzkar erməni keşişləri kimi davranır. Bu, əlbəttə, bizdə təəssüf doğurur, lakin, bu addımların ziyanı bizə yox, elə İran dövlətinin özünədir”.

Deputat qeyd edib ki, İranda başa düşməyənlar anlamalıdır ki, indi bu cür təbliğatla nəyəsə nail olmaq olmaz: “Dövr artıq dəyişib, orta əsrin şallaq təfəkkürü ilə müasir hüquq sisteminə insan hüquqlarından dərs keçmək olmaz. Ona görə də yaxşı olar ki, güc və imkanlarımızı dostluq və əməkdaşlığa, birgə inkişafa sərf edək”.

#
#

ƏMƏLİYYAT İCRA OLUNUR