Kreml Azərbaycan və Türkiyə prezidentlərinin Naxçıvanda keçiriləcək görüşünə münasibət bildirib.
APA-nın Moskva müxbiri xəbər verir ki, Kremlin mətbuat katibi Dmitri Peskov Rusiyanın Azərbaycan Prezidenti İlham Əliyevin türkiyəli həmkarı Rəcəb Tayyip Ərdoğanla görüşlərinin Qarabağda təhlükəsizliyin təmin edilməsinə və həyatın normallaşmasına kömək edəcəyinə ümid etdiyini söyləyib.
Rusiya prezidentinin mətbuat katibi qeyd edib ki, Türkiyə və Azərbaycan suveren ölkələrdir və əməkdaşlığı inkişaf etdirmək üçün öz suveren hüquqlarından istifadə edirlər.
"Biz Bakı ilə Ankara arasında münasibətlərin nə qədər sıx olduğunu bilirik və öz növbəsində həm Ankara, həm də Bakı ilə eyni dərəcədə sıx münasibətlərimiz var", - deyə Peskov əlavə edib.
Peskov regiondakı Rusiya sülhməramlılarının fəaliyyətindən də danışıb. Bildirib ki, Qarabağdakı Rusiya sülhməramlıları əsl qəhrəmanlıq göstərirlər, heç kim onları öz vəzifələrini yerinə yetirməməkdə qınaya bilməz.
Kremlin sözçüsü onu da qeyd edib ki, hələlik Rusiya sülhməramlılarının Qarabağda qalmaq müddəti barədə danışmaq mümkün deyil.
Peskov hələlik Rusiya, Ermənistan və Azərbaycan liderlərinin üçtərəfli görüşünün təşkili ilə bağlı konkret planların olmadığını da əlavə edib.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
