“Los Angeles Times” baş konsul Nəsimi Ağayevin Ermənistanın son təxribatı ilə bağlı məqaləsini dərc edib

“Los Angeles Times” baş konsul Nəsimi Ağayevin Ermənistanın son təxribatı ilə bağlı məqaləsini dərc edib
# 15 iyul 2020 09:57 (UTC +04:00)

Azərbaycanın Los Ancelesdəki baş konsulu Nəsimi Ağayevin Ermənistanın Azərbaycana qarşı son hərbi təxribatı ilə bağlı yazdığı məqalə ə ABŞ-ın nüfuzlu “Los Angeles Times” qəzetinin ispan dilli versiyasında dərc olunub.

Baş Konsulluqdan APA-ya verilən xəbərə görə, məqalənin ingilis dilində versiyası isə “Medium” onlayn media platformasında dərc olunub.

“COVID-19 böhranının davam etdiyi dövrdə Ermənistan Azərbaycana qarşı hücuma keçir” başlıqlı məqalədə baş konsul 12 iyuldan başlayaraq Ermənistan silahlı qüvvələrinin Azərbaycan ərazisində strateji mövqelər ələ keçirmək məqsədilə ordumuzun Ermənistan-Azərbaycan sərhəddindəki mövqelərinə ağır artilleriyadan istifadə etməklə hücuma keçdiyini qeyd edib. Bu təxribat nəticəsində Azərbaycan ordusunun verdiyi şəhidlərdən bəhs edən N.Ağayev Ermənistan silahlı qüvvələrinin sərhədboyu ərazilərdə hərbi və mülki obyektləri iriçaplı silahlardan istifadə etməklə hədəfə aldığını vurğulayıb.

Baş konsul COVID-19 böhranının öhdəsindən gələ bilməməsi, ölkəni bürüyən ciddi iqtisadi tənəzzül, siyasi rəqiblərin həbs olunması və məhkəmələrin müstəqilliyini aradan qaldıran konstitusiya düzəlişləri səbəblərindən Nikol Paşinyanın rəhbərlik etdiyi Ermənistan hökumətinin ölkə daxilində və beynəlxalq arenada nüfuzunu itirdiyini, onun Azərbaycana qarşı son hərbi təxribatı törətməklə bu daxili problemlərdən diqqəti yayındırmağa çalışdığını qeyd edib.

N. Ağayev 1990-cı illərin əvvəllərində Ermənistanın Azərbaycanın 20 faiz ərazisini işğal etdiyini, nəticədə 800 mindən çox insanın Dağlıq Qarabağ və ətraf yeddi rayondakı öz doğma yurdlarından didərgin salındığını və bundan əvvəl Ermənistandan məcburi köçürülən azərbaycanlılarla birgə Azərbaycanın 1 milyondan çox qaçqın və məcburi köçkünü olduğunu diqqətə çatdırıb.

Baş konsul BMT Təhlükəsizlik Şurası, BMT Baş Assambleyası, Avropa Şurası, Avropa Parlamenti, NATO, İslam Əməkdaşlıq Təşkilatı, Qoşulmama Hərəkatı və digər beynəlxalq təşkilatların Ermənistanın bu qanunsuz əməllərini pislədiklərini və Azərbaycanın ərazi bütövlüyünə dəstək nümayiş etdirdiklərini bildirib. O, bütün bunlara baxmayaraq, sözügedən işğalın hələ də davam etdiyini və beynəlxalq hüququn təmin olunması məqsədilə Ermənistana beynəlxalq təzyiqin göstərilməsinin vacibliyini vurğulayıb.

Diplomat bu gün dünyada beynəlxalq hüququn ciddi aşınması prosesinin müşahidə olunduğunu və bunun beynəlxalq sülhə böyük təhlükə təşkil etdiyini bildirib. Baş konsul qeyd edib ki, beynəlxalq hüquqa hörmətin təmin edilməsi məsuliyyəti ilk növbədə bu hüquq sistemini 75 il öncə yaratmış böyük dövlətlərin üzərinə düşür.

N. Ağayev Ermənistanın ciddi iqtisadi böhranla üzləşdiyini, müstəqillikdən sonra 1.5 milyon erməninin ölkəni daimi tərk etdiyini və yoxsulluq səviyyəsinə görə Cənubi Qafqazda birinci yer tutduğunu, Azərbaycanın isə qitələri birləşdirən irimiqyaslı enerji və nəqliyyat layihələri həyata keçirdiyini və regionun ən güclü iqtisadiyyata malik ölkəsi, eləcə də ABŞ-ın regionda etibarlı strateji tərəfdaşı olduğunu bildirib.

Məqalə sosial şəbəkələrdə geniş şəkildə yayılıb, erməni lobbisinin ciddi narazılığı ilə qarşılanıb.

Məqaləni bu linkdə əldə etmək olar: https://www.latimes.com/espanol/opinion/articulo/2020-07-13/opinion-en-medio-de-la-crisis-del-coronavirus-armenia-lanza-ataque-militar-contra-azerbaiyan

Məqalənin ingilis dilində versiyasını isə buradan oxumaq mümkündür: https://medium.com/@nasimiaghayev/in-the-middle-of-covid-19-crisis-armenia-launches-military-attack-against-azerbaijan-bc49e5b17a41

#
#

ƏMƏLİYYAT İCRA OLUNUR