Milli Məclisin Sədri İran parlamentinin nümayəndə heyəti ilə görüşüb

Milli Məclisin Sədri İran parlamentinin nümayəndə heyəti ilə görüşüb
  • Clock-gray 18:35
  • calendar-gray 17 Fevral 2021

Bu gün Milli Məclisin Sədri Sahibə Qafarova ölkəmizdə səfərdə olan İran İslam Respublikası İslam Şura Məclisinin Milli Təhlükəsizlik və Xarici Siyasət Komissiyasının sədri Müctaba Zünnurinin başçılıq etdiyi nümayəndə heyəti ilə görüşüb.

Milli Məclisin Mətbuat və ictimaiyyətlə əlaqələr şöbəsindən APA-ya verilən məlumata görə, Milli Məclisin Sədri bildirib ki, Azərbaycan və İran dost və qardaş ölkələrdir.

S. Qafarova deyib ki, ortaq tarixi, mədəni və dini dəyərlərimiz münasibətlərimizin qarşılıqlı anlaşma əsasında inkişafı üçün yaxşı zəmin yaradır: “İnanıram ki, bu möhkəm təməl üzərində əlaqələrimiz gələcəkdə daha da genişlənəcək. İranla hərtərəfli əməkdaşlığın dərinləşməsi xalqlarımızın ümumi mənafelərinə xidmət edir. Münasibətlərimizin bu səviyyəyə çatmasında ulu öndər Heydər Əliyevin böyük xidmətləri olub. Bu siyasət bu gün də Prezident İlham Əliyev tərəfindən uğurla davam etdirilir. Dövlət başçılarımızın qarşılıqlı səfərləri, aparılan danışıqlar, ölkələrimiz arasında imzalanmış sənədlər   əlaqələrimizin bugünkü səviyyəyə çatmasında əsaslı rol oynayıb. Siyasi dialoqun ardıcıl xarakter alması iqtisadi, humanitar, mədəni sahələrə də öz müsbət təsirini göstərir. Dövlətlərarası Müştərək Komissiyanın fəaliyyəti, keçirilən biznes forumlar və ikitərəfli görüşlər ticarət dövriyyəsinin artmasına şərait yaradır. Ölkələrimizin Ali qanunvericilik orqanları arasında mövcud olan xoş münasibətlər ikitərəfli və çoxtərəfli formatda əməkdaşlıqda özünü büruzə verir”.

Milli Məclisin Sədri hər iki ölkənin parlamentində dostluq qruplarının fəaliyyət göstərməsini təqdir edib. Bildirilib ki, bu  qruplar arasındakı təmasların  intensivləşdirilməsi, beynəlxalq parlament təşkilatları çərçivəsində çoxtərəfli əsasda görüşlər ümumi hədəflərə çatmaq baxımından önəmlidir. Spiker İranın Azərbaycanın apardığı 44 günlük Vətən müharibəsi dönəmində ölkəmizin haqq işini dəstəkləməsini yüksək dəyərləndirib, bu ölkənin daim Azərbaycanın ərazi bütövlüyünü müdafiə etdiyi üçün öz adından və Azərbaycan parlamenti adından İran xalqına və dövlətinə  təşəkkürünü ifadə edib. S. Qafarova qeyd edib ki, erməni işğalçılarının azad olunmuş Azərbaycan ərazilərində törətdikləri vəhşiliklər, dini abidələrə münasibətdə etdikləri hərəkətlər insanlığa yaraşmayan vandallıqdır. Bu, təkcə Azərbaycana qarşı deyil, bütün müsəlman dünyasına qarşı yönəlmiş mənəvi terrordur. Spiker erməni vandallığının digər bir sübutunun da yaxın günlərdə 29 illiyini qeyd edəcəyimiz Xocalı soyqırımı olduğunu qonaqların diqqətinə çatdırdı: “Bu soyqırımı aktı dinc və silahsız insanlara qarşı törədilmiş misilsiz bir qətliam olub. Bu qətliama dünyanın bir sıra parlamentləri lazımı qiyməti verib, soyqırımı olaraq tanıyıb”.

İran İslam Respublikası İslam Şura Məclisinin Milli Təhlükəsizlik və Xarici Siyasət Komissiyasının sədri Müctaba Zünnuri səfər çərçivəsində keçirdiyi görüşlərdən məmnun qaldığını söyləyib: “Dağlıq Qarabağda Azərbaycanın apardığı Vətən müharibəsi zamanı İran vətəndaşlarının ürəyi Azərbaycanla birlikdə döyünüb. Biz Azərbaycanın ərazi bütövlüyünü, onun haqq işini həmişə dəstəkləmişik. 44 günlük hərbi əməliyyatlar zamanı ən müxtəlif səviyyələrdə verilən bəyanatlar bunu bir daha təsdiqləyir”.

M. Zünnuri Azərbaycanın erməni işğalından azad olunmuş ərazilərinin  minalardan təmizlənməsində, bərpa işlərində, dini abidələrin yenidən qurulmasında İran tərəfinin yaxından iştirak etmək arzusunu bildirib.  Qeyd edilib ki, Qarabağın yenidən dirçəlməsinə onun ölkəsi də öz layiqli töhfəsini vermək niyyətindədir.

İran parlamenti nümayəndə heyətinin üzvləri  Xocalıda törədilən qətliamın ağrı-acılarını ürəkdən hiss etdiklərini, Azərbaycan xalqının məruz qaldığı bu vəhşiliyi qınadıqlarını ifadə ediblər.

Görüşdə parlamentlərarası əlaqələrin gələcək inkişaf perspektivləri, iqtisadi, mədəni, humanitar sahələrdə əməkdaşlığın daha da dərinləşməsi və tərəfləri maraqlandıran digər məsələlər ətrafında fikir mübadiləsi aparılıb.

Görüşdə İranla parlamentlərarası əlaqələr üzrə işçi qrupunun üzvləri Eldar İbrahimov, Madər Musayev, Milli Məclis Aparatının rəhbəri Səfa Mirzəyev, İranın ölkəmizdəki səfiri Seyid Abbas Musəvi və digər rəsmi şəxslər iştirak ediblər.

Firuzə Vahid

Digər xəbərlər