“ABŞ Yaxın Şərqdə müsbət gücdür. Bizim İraqda hərbi varlığımız İŞİD-ə qarşı mübarizəni davam etdirmək üçündür. Dövlət katibi Mayk Pompeonun da dediyi kimi, biz amerikalıları, iraqlıları və müttəfiqlərimizi müdafiə etməyə sadiqik”.
APA-nın xəbərinə görə, bu barədə ABŞ Dövlət Departamentinin mətbuat katibi Morqan Ortaqus bildirib.
“İraqda İŞİD-lə mübarizənin vacibliyi birmənalıdır. İraqa göndərilən nümayəndə heyətinin məqsədi ordunun çıxarılması ilə bağlı müzakirə aparmaq deyil. Prezident Donald Trampın NATO-nun Yaxın Şərq prosesində yaxından iştirak etməklə bağlı çağırışına uyğun olaraq bu gün NATO nümayəndələri Dövlət Departamentində oldular. Bütün bunlara baxmayaraq, İraq və ABŞ hökumətləri arasında müzakirələrə ehtiyac var və bu müzakirələr yalnız təhlükəsizlik məsələləri ilə bağlı deyil, həm də iqtisadi və diplomatik əməkdaşlıqla əlaqəlidir. Biz stabil və suveren İraqla dost olmaq istəyirik”, - deyə M. Ortaqus vurğulayıb.
Xatırladaq ki, İraq parlamenti xarici ölkələrin hərbi qüvvələrinin ölkədən çıxarılması barədə qərar qəbul edib. Parlamentarilər İŞİD terror təşkilatı ilə mübarizə üzrə koalisiya ilə sazişin dayandırılması və xarici ölkələrin qoşunlarının ölkədən çıxmasına səs verib.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
