Amerika

Ana səhifə

Amerika

Amerika erməniləri prezidentliyə namizədlik yarışında Barak Obamanı dəstəkləməyə qərar verib

31 yanvar 2008 08:36 (UTC +04:00)

Erməni diasporunun ən güclü təşkilatı İllinoys ştatından seçilmiş senatorun dəstəklənməsini bir neçə səbəblə izah edib. İlk olaraq B. Obamanın uydurma “erməni soyqırımı”nın tanınmasını nəzərdə tutan 106 saylı qətnamə layihəsinə ciddi dəstək verdiyi bildirilir. İkincisi, senator “erməni soyqırımı”nı tanıyan ABŞ-ın Ermənistandakı səfiri Con Evansın işdən qovulması ilə bağlı prezident Corc Buşa rəsmi etiraz məktubu yollayıb. Bundan başqa, B. Obama prezident seçildiyi təqdirdə 1915-ci il hadisələrini soyqırım kimi tanıyacağını rəsmən bəyan edib. Qara dərili namizəd həmçinin “Azərbaycanla Türkiyənin Ermənistana qarşı tətbiq etdiyi blokada”nı aradan götürməyə, Dağlıq Qarabağ münaqişəsini “demokratiya və öz müqəddəratını təyinetmə prinsipləri” əsasında həll etməyə çalışacağını bildirib. Erməni Milli Komitəsi Buş hakimiyyətinin ünvanına bir sıra ittihamlar da səsləndirib. Onlar indiki prezident saxta “soyqırım”ın tanınması ilə bağlı verdiyi vədə xələf çıxmaqda, Konqresdə bu barədə sənədin qəbuluna mane olmaqda, 907-ci düzəlişi dondurmaqda, “Amerika vergiödəyicisinin pulu ilə” Ermənistandan yan keçən Bakı-Ceyhan layihəsinə dəstək verməkdə, 2002-ci ildə rəsmi Ermənistanı terrora dəstək verən ölkələr sırasına əlavə etməyə cəhd göstərməkdə və İrəvana hərbi-humanitar yardımı ildən ilə azaltmaqda günahlandırıblar. /APA/