Kolumbiya hərbçiləri əməliyya zamanı 2,4 ton kokaini ələ keçirib. Bunun ilin əvvəlindən bəri müsadirə olunan ən böyük narkotik qaçaqmalçılığı olduğu bildirilir.
APA TASS-a istinadən xəbər verir ki, bu barədə ölkənin müdafiə naziri Dieqo Molano bildirib.
“İlin əvvəlindən bəri ən böyük kokain partiyasını gəmi göyərtəsində ələ keçirə bildik. Onun ağırlığı 2,4 tonu keçir”, - deyə nazir “Twitter” səhifəsində yazıb.
Nazirin sözlərinə görə, kokain “Körfəz klanı” cinayət qrupuna məxsusdur. Partiyanın dəyəri 80 milyon dollar olaraq qiymətləndirilir.
Bildirilir ki, narkotik maddə olan gəmi San-Andres adasından 300 km aralıqda aşkar edilib. Hərbçilər gəmidə dördü kolumbiyalı olan 5 nəfəri saxlayıblar.
Kolumbiya Donanmasının məlumatına görə, ilin əvvəlindən bəri ümumilikdə 235 ton kokain müsadirə olunub.