ABŞ hərbçiləri də daxil olmaqla Kabil hava limanında baş verən partlayışlar zamanı həyatını itirənlərin ümumi sayı 100 nəfəri keçib.
APA xəbər verir ki, bu barədə “Wall Street Journal” Əfqanıstan Səhiyyə Nazirliyinin yüksək vəzifəli əməkdaşına istinadən məlumat yayıb.
Bildirilib ki, ötən gün baş verən 6 partlayış nəticəsində 90 Əfqanıstan vətəndaşı, Pentaqonun məlumatına görə, 13 ABŞ hərbçisi vəfat edib.
***
01:12
Kabildə baş verən partlayışlar 90 nəfərin həyatına son qoyub.
APA xəbər verir ki, bu barədə RİA Novosti məlumat yayıb
***
22:40
Kabil hava limanında baş verən partlayışlar nəticəsində 60 nəfər ölüb, 140 nəfər yaralanıb.
APA xəbər verir ki, bu barədə BBC Əfqanıstanın yüksək vəzifəli səhiyyə işçisinə istinadən məlumat yayıb.
***
21:16
Kabil hava limanı yaxınlığında baş verən partlayışlar nəticəsində azı 40 nəfər ölüb, təxminən 120 nəfər yaralanıb.
APA xəbər verir ki, bu barədə "The New York Times" qəzetinin Əfqanıstandakı jurnalisti Fahim Abed “Twitter” səhifəsində məlumat yayıb.
O, yaralıların təxminən 60%-nin ağır vəziyyətdə olduğunu qeyd edib.
***
20:10
Kabil hava limanında baş vermiş partlayış nəticəsində yaralıların sayı 50-ni ötüb.
APA xəbər verir ki, bu barədə "Taliban" sözçüsü Zabiullah Mücahid bildirib.
Onun sözlərinə görə hava limanında 2 partlayış olub.
Qeyd edək ki, "Əl-Cəzirə" telekanalı yerli xəstəxanadakı mənbəyə istinadən məlumat yayıb ki, partlayışlar zamanı ən azı 70 nəfər xəsarət alıb.
***
18:38
Kabil hava limanında terrorçu-kamikadzenin özünü partlatması nəticəsində 13 nəfər həlak olub.
APA-nın məlumatına görə, bu barədə “Taliban” hərəkatının nümayəndəsi “Reuters” agentliyinə bildirib.
Onun sözlərinə görə, ölənlər arasında uşaqlar da var. O, xəsarət alanlar arasında bir neçə “Taliban” üzvünün olduğunu da deyib.
***
18.25
Kabil hava limanının girişində partlayış törədilib.
APA-nın BBC-yə istinadən verdiyi xəbərə görə, partlayış britaniyalı hərbi qulluqçuların bir müddətdir dayandığı və hava limanının terror xəbərdarlığı səbəbi ilə bağlanmış 3 giriş qapısından birində baş verib.
ABŞ rəsmisi “Reuters” xəbər agentliyinə partlayışın terrorçu-kamikadze tərəfindən törədildiyini bildirib. Böyük Britaniya Müdafiə Nazirliyi partlayış nəticəsində itkilərin olmadığını, lakin əminliklə danışmaq üçün hələ tez olduğunu deyib.
“Pajhwok” agentliyi 2 nəfərin öldüyünü, 15 nəfərin yaralandığını açıqlayıb.
Pentaqondan verilən məlumata görə isə 3 ABŞ hərbçisi xəsarət alıb.
Qeyd edək ki, partlayışdan sonra hadisə yerində silah səslərinin eşidilməsi ilə bağlı məlumat yayılıb.
Əfqan jurnalist Əhməd Mengli isə CNN-Türkə bildirib ki, partlayış zamanı 11 nəfər ölüb, çox sayda yaralı var.
Digər yerli qaynaqlar da partlayış nəticəsində 11 nəfərin həlak olduğunu, həlak olanlar arasında əcnəbi hərbçilərin olduğunu xəbər verir.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
