Avropa

Ana səhifə

Avropa

Rauf Denktaş Türkiyədə insan haqları pozuntularına yol verildiyini bildirib

23 iyul 2008 15:06 (UTC +04:00)

Lefkoşa APA. Şimali Kipr Türk Respublikasının keçmiş prezidenti Rauf Denktaş bəzi dairələrin onu ““Ergenekon əməliyyatı”na daxil etməyə çalışdığını bildirib. APA-nın Türkiyə xəbər agentliklərinə istinadən verdiyi məlumata görə, R. Denktaş belə cəhdlərin əbəs olduğunu bildirib: “Biz Türkiyə aşiqiyik, hər zaman ana vətən üçün çalışdıq. Kipr məsələsinə də ana vətənin mənafeyi çərçivəsində yanaşmışıq. Mənim əleyhimə heç nə tapa bilməzlər”. Sabiq prezident hazırda həbsdə olan ordu generalları Xurşid Tolon və Şənər Əruyğuru “əziz dostlar” adlandırıb: “Türkiyənin bütün hərbi və mülki elitası ilə illərdir təmasdayam. Kiprə gəlib xidmət edənlərlə isə qardaş kimiyik”. R. Denktaş Atatürk ideyaları, Kipr problemi, türban məsələsi ilə bağlı fikirlərini açıqlamağa davam edəcəyini söyləyib: ”Deyəsən, işlərinə bir az çox qarışıram. Ona görə də susdurulmağım lazım gələcəksə, həll edəcəklər”. R. Denktaş “Ergenekon” istintaqı çərçivəsində həbs olunmuş şəxslərdən birinin öldüyünü xatırladaraq bəyan edib ki, bu istintaqda insan haqları baxımından düzəldilməsinə ehtiyac olan məsələlər var. O, ABŞ-ın bütün dünyada həbs etdiyi şübhəliləri Quantanamoya aparıb dindirdiyinə diqqət çəkərək “Türkiyə Quantanamonu model kimi qəbul edə bilməz”, deyib.