Qvineyadakı siyasi vəziyyət fonunda bu gün alüminiumun qiyməti son 10 ilin ən yüksək həddinə çatıb.
"APA-Economics"in xarici mətbuata istinadən verdiyi məlumata görə, Bakı vaxtı ilə saat 16:17-də London Metal Birjasında üç aya çatdırılma şərti ilə bir ton alüminiumun qiyməti 0,91% artaraq 2 756 ABŞ dolları təşkil edib. Bu, 2011-ci ilin may ayından bəri qeydə alınan ən yüksək qiymətdir. Ümumilikdə, alüminium ardıcıl səkkizinci aydır bahalaşır və bu müddət ərzində sənaye metalının maya dəyəri 34,53% artıb.
Qeyd edək ki, Qvineya alüminium istehsalı üçün lazım olan boksitin əsas təchizatçısıdır və Çinin alüminium idxalının yarıdan çoxu Qvineyanın payın düşür.
Azərbaycan öz növbəsində, cari ilin yanvar-iyul aylarında 72,815 mln. dollar dəyərində 30 558,64 ton alüminium və ondan hazırlanan məmulatları ixrac edib. İxrac edilən alüminiumun dəyəri ötən ilin müvafiq dövrünün göstəricisi ilə müqayisədə 42%, həcmi isə 5,7% artıb.
Xatırladaq ki, sentyabrın 5-də Qvineyada hərbi çevriliş olub, qiyamçıların lideri polkovnik Mamadi Dumbuya hökumətin buraxıldığını, Konstitusiyanın qüvvəsini dayandırdığını və ölkənin sərhədlərinin bağlanıldığını elan etmişdi. Bundan əlavə, prezident Alfa Kondenin həbs olunduğunu da bildirilmişdi.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
