“Bu gün bizim çox əla konfransımız oldu. Azərbaycan Prezidenti İlham Əliyev çıxışında çox açıq idi, ona verilən çoxsaylı suallara səmimi və dürüst şəkildə cavab verdi. Bununla beynəlxalq ekspertlərin Azərbaycanın müharibəni belə minimum itkilərlə necə aparması barədə daha yaxşı fikir formalaşdı. Əliyevin də dediyi kimi, Azərbaycanın perspektivindən baxdıqda, Qarabağ münaqişəsi bitib, artıq həll olunub. 2020-ci il noyabrın 9-da qəbul olunan bəyanat elə bu barədədir”.
APA-nın məlumatına görə, bunu ATƏT-in Minsk qrupunun keçmiş həmsədri, beynəlxalq ekspert Metyu Brayza deyib.
Onun fikrincə, bu, onların illər ərzində Minsk Qrupu çərçivəsində “Madrid prinsipləri”nə əsaslanan həll yolunun bənzəridir: “Bu prinsipləri 2009-cu ildə Ermənistan və Azərbaycan tərəfi qəbul etmişdi. Beləliklə, bu nəticə ədalətlidir, çünki ortada hər iki ölkənin razılığı var. Olmayan isə Dağlıq Qarabağın qanuni statusu ilə bağlı məsələdir. Dağlıq Qarabağın qanuni statusu ilə bağlı məsələnin şansı qalmayıb, çünki Ermənistan müharibəni uduzub”.
Sabiq həmsədrin sözlərinə görə, Prezident Əliyev deyib ki, Azərbaycan tarixində bu münaqişə ilə bağlı səhifə artıq qapanıb: “O, həqiqətən də gələcəyə doğru irəliləmək istədiyini, müharibəni və münaqişəni əbədi olaraq arxada qoymaq istədiyini vurğuladı.
Lakin Ermənistan münaqişənin sona çatmasını qəbul etməyə hazır deyil. Buna zaman lazım olacaq və psixoloji travma keçəcək, lakin Azərbaycan artıq irəliyə doğru gedir, ərazilərini bərpa edir”.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
