Deputat Tarif Şurasının ləğv edilməsini, səlahiyyətlərinin Parlamentə verilməsini təklif edib - VİDEO - YENİLƏNİB

Deputat Tarif Şurasının ləğv edilməsini, səlahiyyətlərinin Parlamentə verilməsini təklif edib - VİDEO  - YENİLƏNİB

© APA | Deputat Razi Nurullayev

# 02 iyul 2021 11:52 (UTC +04:00)

“Tarif Şurasının qəbul etdiyi qərarlar ciddi sosial narazılıq yaradır, əsaslandırmalar da tutarlı deyil”.

APA-nın məlumatına görə, bunu Milli Məclisin bu gün keçirilən iclasında deputat Razi Nurullayev deyib.

Deputat bildirib ki, hökumət dövlət müəssisələrinə külli miqdarda büdcə vəsaiti ayrıldığın, onların isə səmərəli işləmədiyini açıq şəkildə deməlidir: “Dövlət müəssislərin götürdüyü kreditləri hələ 20-30 il bundan sonra da ödəyəcək. Yəni bizdən sonra gələn nəsil də onların kreditlərini ödəməli olacaq. Səmərə və effektivlik varmı? Bahalaşma ona görədir ki, məhz ayrılan dotasiyalara görə əmək haqlarını və pensiyaları qaldırmaq olmur. Məhz, ona görədir ki, uşaq pulu adı gələndə aidiyyəti vəzifəli şəxslər qulaqlarını tutur.

Xalq gözünü SOCAR-a dikib, o belə dövlət büdcəsindən dotasiya alır. Belə yanaşma dünyada varmı? Bəlkə var, mən bilmirəm. AZAL büdcə pulu və dövlətin zəmanəti ilə təyyarə alır, biz isə basa-basa gedib Tiflisdən uçuruq”.

Deputat təklif edib ki, Tarif Şurası ləğv edilsin, səlahiyyətləri isə Parlamentə verilsin: “10 milyonluq xalqın hər bir ailəsinin və fərdinin gündəlik yaşayışına təsir edən qərarları 5-6 nəfər yox, 10 milyonluq xalqın hər bir nəfərini təmsil edən Milli Məclis üzvləri qəbul etməlidir”.

#
#

ƏMƏLİYYAT İCRA OLUNUR