Deputatlar Şuşa Bəyannaməsinin imzalanmasını yüksək qiymətləndirir

Milli Məclisin iclası

© APA | Milli Məclisin iclası

# 22 iyun 2021 11:42 (UTC +04:00)

“100 il əvvəl Qars müqaviləsinin bağlanması Azərbaycanın inkişafına çox mühüm təsir göstərdi”.

APA-nın məlumatına görə, bunu Milli Məclisin bu gün keçirilən iclasında deputat Fəzail Ağamalı deyib.

Deputat bildirib ki, 100 il sonra Azərbaycanın ərazi bütövlüyünün təminatçısı olaraq Şuşa Bəyannaməsi imzalandı: “Artıq Türkiyə və Azərbaycan arasında hərbi müttəfiqlik təsbit olundu. Bəyannamədə bəzi mühüm müddəaların yer alması bizim gücümüzü daha da artırır. Bu sənəd Azərbaycanın daha güclü ordusunun yaradılmasına sözsüz ki, öz töhfəsini verəcək”.

Deputat Cavid Osmanov qeyd edib ki, Azərbaycanla Türkiyə arasında olan qardaşlıq münasibətləri yeni mərhələyə qədəm qoyub.

Deputat bildirib ki, Türkiyə dünya masştabında güclü ölkəyə çevrilib: “Şuşa Bəyannaməsinin imzalanmasının çox böyük tarixi əhəmiyyəti var. Bu bəyannamənin Şuşada imzalanması tarixi hadisədir. İkincisi, bu bəyannamənin imzalanması günü təsadüfi seçilməmişdi. 15 iyunu biz Qurtuluş günü kimi qeyd edirik. Şuşa Bəyannaməsi bölgədə sülhə, əmin-amanlığa dəstək olacaq sənəddir. Bu sənəd hər iki ölkənin milli maraqlarına uyğundur. Bununla bağlı 48 partiya da dəstək verdi. İki partiya isə çox təəssüf ki, yenə də kənarda qaldı”.

Milli Məclisin İnsan hüquqları komitəsinin sədri Zahid Oruc deyib ki, iki gün əvvəl Ermənistanda keçirilən növbədənkənar parlament seçkilərinin yekunları Vətən Müharibəsində parlaq qələbəmizin nəticələrinə tam uyğundur, 10 noyabr razılaşmasının ümumxalq səsverməsi ilə qəbuludur: “Digər tərəfdən, erməni xalqı və ordusu yeni müharibələrə qadir olmadığını, işğal partiyasının rəhbərləri Koçaryanın və Sarkisyanın 30 illik istismar düşərgələrində və səngərlərində bir daha ölmək istəmədiklərini nümayiş etdirdi. Əks halda, dünya tarixində məğlub Ali Baş komandana yenidən mandat verilməsi görünməmiş hadisədir. Deməli, Azərbaycanın qələbəsi 90-cı illərdə miflərlə aldadılmış başqa bir xalqı da xilas etdiyi üçün 687 min insan indi sülhə səs verir. Ona görə də 15 iyunda - Azərbaycan dövlətinin xilası günündə Şuşada Türkiyə dövləti ilə imzalanan hərbi-siyasi İttifaqı Ermənistana təhlükə kimi qələmə verənlərin qorxu və xof siyasəti nəticə vermədi. Çünki erməni xalqı başa düşür ki, onların təhlükəsizliyinə və siyasi gələcəyinə üçüncü dövlətlərin verdikləri hərbi təminat Türkiyə və Azərbaycanın qarantiyasını əvəz edə bilməz. İki dövlətin hərbi İttifaqı başqa ərazilərə hücum planı deyil, əksinə 100 illik Qars müqaviləsinə istinad edilməsi Şuşanı Qafqazın sülh mərkəzinə döndərir. Ərdoğanın səfəri qardaş ölkənin dövlət başçısının Şuşaya ilk səfəri olsa da, yeni seçilən İran prezidenti, o cümlədən, ABŞ və Rusiya rəhbərləri də gəlib Şuşada ölkə rəhbərinin ziyarətində ola bilərlər. Onlara da yol açıqdır”.

Deputat Tural Gəncəliyev isə ötən həftə sonu keçirilmiş Antalya Diplomatiya Forumu haqqında danışıb, Türkiyənin xarici işlər naziri Mövlüd Çavuşoğlunun dəvəti ilə Forumda iştirak etdiyini bildirib. Deputat qeyd edib ki, Türkiyə qlobal güc mərkəzinə çevrilir: “Forumda Azərbaycana xüsusi diqqət göstərilirdi. Bütün ölkələrin təmsilçiləri Azərbaycanın hazırda Cənubi Qafqazda və Cənubi Qafqazdan kənarda rolunu xüsusi qiymətləndirirdilər. Türkiyədə ənənəvi olaraq keçiriləcək bu forumda iştirak etmək çox əhəmiyyətlidir. Bu forum yeni regional məsələləri müzakirə etmək baxımından çox vacibdir”.

#
#

ƏMƏLİYYAT İCRA OLUNUR