Beynəlxalq Cüdo Federasiyası (İJF) yeni reytinq siyahısını açıqlayıb.
Apasport.az saytının məlumatına görə, Macarıstanda təşkil olunan “Böyük dəbilqə” turnirindən sonra cədvəldə dəyişikliklər olub.
Azərbaycanın 8 cüdoçusu ilk “20-lik”də yer alıb. Budapeştdə çempion adını qazanan Rüstəm Orucov (73 kq) xal hesabını 6225-ə çatdırıb. Ən yaxşı təmsilçimiz reytinqdə 2-cidir.
Macarıstanda bürünc qazanan Məmmədəli Mehdiyev (90 kq) üç pillə irəliləyərək 5-ci sıraya qalxıb. Onun 4159 xalı var. Yarışa qatılmayan və nəticədə 1 pillə geriləyən İrina Kindzerska da (+78 kq) 5-cidir – 4974 xal. Elmar Qasımov (100 kq) da ilk “onluq”dadır. 2 pillə irəliləyən cüdoçumuz 3822 xalla 10-cu yerdədir.
Çəki dərəcəsini 81 kq-ya dəyişən Hidayət Heydərov (73 kq) 3346 xalla 11-ci, Zelim Kotsoyev (100 kq) 3099 xalla 12-ci, Uşanqi Kokauri (+100 kq) 2518 xalla 17-cidir. Hər üç cüdoçu 1 pillə geriləyib. 2402 xalla 20-ci olan Nicat Şıxəlizadə (66 kq) 4 pillə aşağı yuvarlanıb.
Budapeştdə medal qazanan digər cüdoçumuz Orxan Səfərov (66 kq) 5 pillə irəliləyib. 2196 xala malik idmançımız 22-cidir.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
