AVRO-2020-nin 1/8 final mərhələsi davam edir.
Apasport.az saytının məlumatına görə, günün ilk oyununda Kopenhagendə son dünya çempionatının vitse-çempionu Xorvatiya ilə üçqat Avropa çempionu İspaniya qarşılaşıb.
Qrup mərhələsində ikinci olan rəqiblərin duelində xorvatlar kuryoz qolla hesabı açıb. Lakin Zlatko Daliçin kollektivi bu üstünlüyü qoruyub saxlaya bilməyib. Fasilə ərəfəsində Pablo Sabaria ilə status-kvonu bərpa edən “buğalar” dramatik alınan ikinci hissənin əvvəllərində önə də keçib. Bu dəfə Sezar Azpilikueta başla millidə “siftə”sini edib.
Ferran Torres 77-ci dəqiqədə rəqibi üçüncü dəfə məyus etsə də, xorvatlar təslim olmayıb. Əvvəlcə Mislav Orsiç fərqi minimuma endirərək, komandasını ümidləndirib. Son dəqiqələrdə isə Mario Paşaliç toru silkələyib. Bu da türkiyəli baş hakim Cüneyt Çakırın matçı daha 30 dəqiqə davam etdirməsinə səbəb olub.
Qol “yağışı” əlavə olunmuş dəqiqələrdə də davam edib. Ancaq bu dəfə bir komandanın ifasında. Sonradan meydana daxil olan Dani Olmonun dörd dəqiqə ərzində iki assisti Luis Enrikenin yetirmələrini yenidən 2 top fərqi ilə önə keçirib.
Bu dəfə üstünlüyü əldən verməyən ispanlar bu gün keçiriləcək Fransa – İsveçrə cütünün güclüsü ilə 1/4 finalda üz-üzə gələcək.
AVRO-2020
1/8 final
28 iyun
20:00. Xorvatiya – İspaniya - 3:3, ə.v. 0:2
Qollar: Pedri (avtoqol), Mislav Orşiç, 85, Mario Paşaliç, 90+2 - Pablo Sabria, 38, Sesar Azpilikueta, 57, Fernan Torres, 77, Alvaro Morata, 100, Mikel Oyarzabal, 104
Baş hakim: Cüneyt Çakır (Türkiyə)
Kopenhagen. “Parken” stadionu
Qeyd edək ki, bunadək Danimarka, İtaliya, Çexiya və Belçika 1/4 finala yüksəlib. 1/8 final mərhələsinə sabah yekun vurulacaq.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
