Baş Prokurorluğun əməkdaşları Rusiyada səfərdə olub

Baş Prokurorluğunun bir qrup əməkdaşı Rusiyada səfərdə

© APA | Baş Prokurorluğunun bir qrup əməkdaşı Rusiyada səfərdə

# 06 dekabr 2021 11:39 (UTC +04:00)

Azərbaycan və Rusiya Baş Prokurorluqları arasında imzalanmış 24 iyun 2019-cu il tarixli “Əməkdaşlıq haqqında Saziş”in icrası ilə əlaqədar 2021-2023 illəri əhatə edən Əməkdaşlıq proqramının 1-ci bəndinə uyğun olaraq “Prokurorların məhkəmələr tərəfindən baxılan mülki və arbitraj, eləcə də inzibati xətalara dair işlərdə iştiraklarının təmin edilməsi istiqamətində işin təşkili” mövzusunda Moskva şəhərində 29-30 noyabr 2021-ci il tarixlərdə keçirilmiş tədbirdə bir qrup prokurorluq əməkdaşı iştirak edib.

Baş Prokurorluğun mətbuat xidmətindən APA-ya verilən məlumata görə, Azərbaycan Respublikası Baş Prokurorluğunun Cinayət təqibindən kənar icraatlar idarəsinin rəis müavini Şəmşir Şəmşirlinin rəhbərlik etdiyi qrupun tərkibində CTKİİ-nin prokuroru Babək Zakirzadə, Səbail rayon prokurorunun köməkçisi Hillal Abbasov və Qazax rayon prokurorunun köməkçisi Tərlan Kərimov görüşlərdə iştirak ediblər
Nümayəndə heyətinin üzvləri Rusiya Federasiyası Baş Prokurorluğunun Mülki Mühakimə Baş İdarəsi və onun tərkibində olan Mülki, İnzibati və Arbitraj İşlərində Məhkəmə Baxışlarında Prokurorların İştirakının Təmin Edilməsi İdarəsinin, Federal Qanunvericiliyin İcrasına Nəzarət Baş İdarəsinin Azyaşlıların Hüquq, Azadlıqlarının və Maraqlarının Təmin Edilməsi İdarəsinin, Hüquqi Statistika və İnformasiya Texnologiyaları Baş İdarəsinin və digər struktur qurumlarının rəhbərliyi və əməkdaşları ilə görüşlər keçiriblər.

Rusiya Federasiyasında ictimai maraqların, xüsusilə də ətraf mühitin qorunması və əhalinin həssas qruplarının maraqlarının qorunması, bu məqsədlə mülki iddiaların qaldırılması, inzibati icraatların başlanması təcrübəsi öyrənilib, hüquqi ədəbiyyat və informasiya resurslarından davamlı istifadə edilməsi məsələsi müzakirə olunub.
Eyni zamanda nümayəndə heyətinin üzvləri Azərbaycan Respublikası Baş Prokurorluğunun Cinayət təqibindən kənar icraatlar idarəsinin ətraf mühitin qorunması, yetkinlik yaşına çatmayan şəxslərin maraqlarının qorunması məqsədilə gördüyü işlər, mövcud qanunvericiliyin tələbləri barədə rusiyalı həmkarlarına məlumat veriblər.
Daha sonra, Rusiya Federasiyasının Baş Prokurorluğunun əməkdaşlarına cinayət təqibindən kənar icraatlar sahəsində prokuror fəaliyyəti üzrə toplanmış təcrübənin öyrənilməsinin zəruriliyi vurğulanmış, bu sahədə əməkdaşlığın perspektivləri müzakirə edilib.
Azərbaycan Respublikasının prokurorluq orqanlarında həyata keçirilmiş islahatlar, xüsusilə şəffaflığın və cavabdehliyin təmin edilməsi məqsədilə mütərəqqi Avropa və dünya standartlarının tətbiqi istiqamətində görülmüş tədbirlər Rusiya Federasiyası Baş Prokurorluğunda xüsusi maraqla qarşılanıb.
“Əməkdaşlıq haqqında” Saziş hər iki ölkənin Baş Prokurorluqları arasında əlaqələrin daha da dərinləşməsi və möhkəmlənməsinə xidmət edir.

#
#

ƏMƏLİYYAT İCRA OLUNUR