Hadisə

Bakı Dövlət Universitetinin (BDU) sabiq kafedra müdirinə qarşı dələduzluqda təqsirləndirilən Əliyev Elbrus Şahmar oğlunun cinayət işi üzrə məhkəmə prosesi başlayıb.

APA-nın xəbərinə görə, Bakı Ağır Cinayətlər Məhkəməsində hakim Əli Məmmədovun sədrliyi ilə keçirilən prosesdə prokuror ittiham aktını elan edib.

İttihama görə, təqsirləndirilən şəxs Elbrus Əliyev müxtəlif vaxtlarda hər birindən 50 min manat almaqla üç nəfərə qarşı dələduzluq edib.

Belə ki, E. Əliyev Abşeron Rayon Prokurorluğunda qeyri-rəsmi köməkçi olduğunu bildirərək, etibardan sui-istifadə edib, üç nəfərdən ümumilikdə 150 min manat alıb.

Təqsirləndirilən şəxs həmin şəxslərə müxtəlif məsələlərdə köməklik göstərəcəyini söz verib.

Bütün sübutlar nəzərə alınaraq, Əliyev Elbrus Şahmar oğluna Cinayət Məcəlləsinin dələduzluq, rüşvət alma ittihamı verilib.

Prosesdə təqsirləndirilən şəxs ifadə verib.

E. Əliyev ifadəsində şəxsi ehtiyaclarına görə bu yola əl atdığını bildirərək, özünü qismən təqsirli bildiyini deyib: "Abşeron Rayon Məhkəməsində qeyri-rəsmi köməkçi işləmişəm. İlk epizod üzrə onu deyə bilərəm ki, Bakı Dövlət Universitetində müəllim işləyən Hüseyn Məmmədov mənə dedi ki, oğlu prokurorluq orqanlarına qəbulla bağlı imtahanda müsbət nəticə göstərə bilmədiyini üçün kömək etməyimi istəyir. Mən də razılıq verdim. Əvvəlcə ondan 30 min manat aldım, 20 min manat da səhəri gün verdi. Pulu alanda özüm bilirdim ki, mümkün olan məsələ deyil. Kömək etmək niyyətində də deyildim. Dediyim kimi, ehtiyac olduğu üçün pulu aldım. Kömək etməyim heç cür mümkün deyildi”.

Təqsirləndirilən şəxs qeyd edib ki, Asim adlı uzaq qohumu onunla əlaqə saxlayaraq kürəkəninin cinayət işi ilə bağlı köməklik etməsini istəyib: “Cinayət işinə elə bu məhkəmədə baxılırdı. Onunla razılaşdım, dedim ittiham aktını ver tanış olum. Dedim ki, bu cinayəti işi ilə bağlı müəyyən köməklik göstərmək olar. Fikirləşdim ki, 7-8 il həbs cəzası alsa, onsuz da razı qalacaq. Sonradan heç məhkəməyə də gəlmədim. Həmin şəxsə də 10 il iş verdilər".

Təqsirləndirilən şəxs zərərçəkmiş Vəli Nəsibovdan oğlunu universitetə düzələcəyini deyərək 50 min manat aldığını deyib: "Vəli müəllimlə də münasibətimiz olub. Onunla görüşümüz şəhərdə yerləşən kafelərdən birində oldu. Mənə dedi ki, oğlunun Tibb Universitetində təhsili almasına kömək edim. Ondan da 50 min manat aldım. Guya oğlunu testdən keçirməli idim. Dövlət İmtahan Mərkəzi ilə heç əlaqəm də yox idi. Bütün aldığım pulları da şəxsi ehtiyaclarım üçün istifadə etmişəm".

Hakimin "Siz necə vədlər vermisiniz ki, bu şəxslər sizə inanıb bu qədər pul verib" sualına təqsirləndirilən şəxs "Buna görə də mənə etibardan sui-istifadə maddəsi ilə ittiham verilib", - deyə cavab verib.

Məhkəmədə hakim cinayət işi üzrə dəymiş 150 min manatın ödənildiyini deyib.

Təqsirləndirilən şəxs dəymiş ziyanın hamısının şəxsən ödədiyini bildirib.

Növbəti proses noyabrın 29-na təyin olunub.

Qeyd edək ki, oğlunun prokurorluq orqanlarına işə düzəlməsi üçün E.Əliyevə 50 min manat verən Hüseyn Məmmədov Bakı Dövlət Universitetində Sosial elmlər və Psixologiya fakültəsinin müəllimi, kafedra müdiri olub.

Sözügedən cinayət işi üzrə iki il əvvəl Eldar Yusifov təqsirləndirilərək məhkəməyə çıxarılıb.

E.Yusifov məhkəmədə təqsirsiz olduğunu, pulları Elbrus Əliyevin aldığını deyib.

Bakı Ağır Cinayətlər Məhkəməsinin hökmü ilə E. Yusifov Cinayət Məcəlləsinin 178.3.2 (külli miqdarda dələduzluq) və 34, 312.2-ci (rüşvət verməyə təhrik etmə) maddələri ilə təqsirli bilinərək 11 min manat cərimə olunub və məhkəmə zalından azadlığa buraxılıb.

Zərərçəkmiş Hüseyn Məmmədov Eldar Yusifovun günahsız olduğunu, pulu Elbrus Əliyevə verdiyini bildirib.