Baş Prokurorluq Türkiyə vətəndaşının müraciəti əsasında polisin qərarını ləğv edib

Baş Prokurorluq Türkiyə vətəndaşının müraciəti əsasında polisin qərarını ləğv edib
# 02 sentyabr 2020 12:05 (UTC +04:00)

Avqustun 31-də “fatih_turan_1977” adlı istifadəçinin Baş Prokurorluğun “prokurorluq” adlı instaqram sosial şəbəkəsinə müraciəti Baş Prokurorluğun Mətbuat xidməti tərəfindən vətəndaşın müraciətinin operativ həlli və müraciətə baxılması zamanı çevikliyin təmin olunması məqsədilə dərhal Baş Prokurorluğun rəhbərliyinə, o cümlədən əlaqədar idarələrə təqdim olunub.

Baş Prokurorluğun mətbuat xidmətindən APA-ya verilən məlumata görə, müraciət nəzarətə götürülməklə araşdırma aparılması barədə verilmiş göstəriş əsasında paytaxtın Xətai rayonu ərazisində yaşayan Türkiyə vətəndaşı Turan Fatih Hüseyn oğlu Abşeron rayon prokurorluğuna dəvət edilərək dinlənilib, F.Turan Vüsal və Sürxan adlı şəxslərin onun 15 min manat pulunu dələduzluq yolu ilə ələ keçirmələri ilə bağlı Abşeron rayon Polis İdarəsinin Mehdiabad Polis Bölməsinə müraciəti əsasında aparılmış araşdırmanın nəticəsindən narazı olduğunu, dələduzluq faktına görə obyektiv araşdırma aparılmaqla ona dəymiş ziyanın ödənilməsində köməklik göstərilməsini xahiş edib.

Toplanmış materiallar rayon prokurorluğu tərəfindən tələb edilərək öyrənilib, material üzrə cinayət işinin başlanmasının rədd edilməsinə dair qərar ləğv olunmaqla fakta görə Cinayət Məcəlləsinin 178.2.4-cü (xeyli miqdarda ziyan vurmaqla dələduzluq) maddəsi ilə cinayət işi başlanılaraq ibtidai istintaqın aparılması üçün Abşeron Rayon Polis İdarəsinin İstintaq Şöbəsinə göndərilib.

Hazırda cinayət işi üzrə intensiv istintaq tədbirləri aparılır, qanun pozuntularına yol verib və cinayətin törədilməsində bu və ya digər formada iştirak etmiş şəxslərin cinayət məsuliyyətinə cəlb edilməsi təmin ediləcək.

#
#

ƏMƏLİYYAT İCRA OLUNUR