Azərbaycanla Rusiya arasında dəmir yolları ilə yükdaşımalar ötən il 30%-dən çox artıb

#
# 18:07
6 mart 2020

“Azərbaycan Dəmir Yolları” QSC-də Rusiya Federasiyasının Rostov vilayətinin İqtisadi inkişaf naziri Maksim Papuşenkonun rəhbərlik etdiyi nümayəndə heyəti ilə görüş olub.

“Azərbaycan Dəmir Yolları”dan “APA-Economics”ə verilən məlumata görə, QSC-nin sədri Cavid Qurbanov Rusiya ilə dəmir yolu sahəsində əməkdaşlığın yüksək səviyyədə olduğunu vurğulayıb. Görüşdə Azərbaycan ərazisindən keçən beynəlxalq nəqliyyat dəhlizlərinin reallaşması istiqamətində görülən işlərdən də söhbət açılıb. Cavid Qurbanov ölkələrimiz arasında nəqliyyat və tranzit sahəsində əməkdaşlıq imkanlarının geniş olduğunu deyib. 2019-cu ildə Rusiya ilə yükdaşımaların həcmində 30 faizdən çox artımın qeydə alındığını diqqətə çatdırıb.

Məlumata əsasən, Azərbaycan və Rusiya arasında dəmir yolları ilə 2019-cu ildə 6 mln 240 min ton, 2018-ci ildə 4 mln 744 min ton, 2017-ci ildə isə 4 mln 774 min ton yük daşınıb. Beləliklə, 2019-cu ildə iki ölkə arasında yük mübadiləsi 2018-ci illə müqayisədə 31,5%, 2017-ci illə müqayisədə isə 30,7% artıb.

C. Qurbanov ölkəmizin əlverişli coğrafi mövqeyindən səmərəli istifadə etməklə regionun nəqliyyat mərkəzinə çevrilməsinin təmin edilməsi, dəmir yolu infrastrukturunun yenidən qurulması istiqamətində görülən kompleks tədbirlər haqqında da məlumat verib.

Maksim Papuşenko Şimal-Cənub və Şərq-Qərb nəqliyyat dəhlizlərinin hər iki ölkənin tranzit potensialının artırılmasında mühüm rolunu qeyd edib. Vilayətin iqtisadi imkanlarından söhbət açan nazir beynəlxalq nəqliyyat marşrutları vasitəsilə idxal, ixrac və tranzit yüklərin daşınmasında maraqlı olduqlarını vurğulayıb.

Görüşdə Rusiyanın Rostov şəhərində yerləşən “Cənub Universiteti”nin (İdarəetmə, biznes və hüquq institutu) rektoru, professor İmran Əkbərov humanitar sahədə əməkdaşlıq məsələlərindən danışıb.

Sonra tərəflər qarşılıqlı əməkdaşlıq əlaqələrinin daha da genişləndirilməsi məsələlərini müzakirə ediblər.

#
#

ƏMƏLİYYAT İCRA OLUNUR