Sumqayıt və Gəncədə güzəştli mənzillərin tikintisinin nə vaxt tamamlanacağı açıqlanıb

#
# 16:22
3 sentyabr 2020

Azərbaycan Mənzil İnşaatı Dövlət Agentliyi (MİDA) Gəncə və Sumqayıt şəhərlərində güzəştli mənzillərin tikintisini davam etdirir.

MİDA-dan “APA-Economics”ə verilən məlumata görə, Sumqayıt şəhərində reallaşdırılan layihə üzrə bütün işlərin yaxın zamanlarda yekunlaşdırılması və binaların istismara verilməsi nəzərdə tutulur.

Gəncə Yaşayış Kompleksində işlərin birinci mərhələsinin cari ildə, ikinci mərhələsinin isə 2021-ci ilin sonunadək yekunlaşdırılması planlaşdırılır.

“Regionlarda yaşayan vətəndaşların mənzil məişət şəraitinin yaxşılaşdırılması məqsədilə Agentlik tərəfindən davamlı olaraq münasib torpaq sahələrinin müəyyənləşdirilməsi istiqamətində işlər aparılır. Respublikanın digər şəhər və rayonlarında da müvafiq layihələrin həyata keçirilməsi planlaşdırılır”, - deyə MİDA-dan bildirilib.

Qeyd edək ki, Gəncə Yaşayış Kompleksi 12 doqquzmərtəbəli və 6 on iki mərtəbəli olmaqla 18 yaşayış binasından ibarətdir. Bu binalarda ümumilikdə 986 mənzil olacaq ki, onlardan 48-nin birotaqlı, 68-nin studio tipli, 318-nin ikiotaqlı, 466-nın üçotaqlı, 86-nın isə dördotaqlı olması nəzərdə tutulur. Birotaqlı və studio tipli mənzillərin sahəsi hər biri təqribən 35, ikiotaqlı mənzillərin sahəsi təqribən 57, üçotaqlı mənzillərin sahəsi təqribən 75, dördotaqlı mənzillərin sahəsi təqribən 97 kvadratmetr təşkil edəcək. Yaşayış binaları ilə yanaşı 125 yerlik uşaq bağçasının, 1 176 şagird yerlik orta təhsil məktəbinin istifadəyə verilməsi nəzərdə tutulub.

Sumqayıt şəhərində reallaşdırılan layihə 2 ədəd doqquzmərtəbəli 2 bloklu yaşayış binasından ibarətdir. Bu binalarda ümumilikdə 144 mənzil olacaq ki, onlardan 18-i birotaqlı, 18-i studio tipli, 72-si ikiotaqlı, 36-sı isə üçotaqlıdır. Birotaqlı və studio tipli mənzillərin sahəsi hər biri təqribən 35, ikiotaqlı mənzillərin sahəsi təqribən 56, üçotaqlı mənzillərin sahəsi təqribən 74 kvadratmetr təşkil edəcək.

#
#

ƏMƏLİYYAT İCRA OLUNUR