AMB sığorta şirkətlərinin rəhbərlərinə tövsiyələr verib

AMB sığorta şirkətlərinin rəhbərlərinə tövsiyələr verib
# 05 may 2020 15:45 (UTC +04:00)

Azərbaycanda Mərkəzi Bankı (AMB) pandemiya ilə əlaqədar yaranmış vəziyyətlə bağlı sığortaçılara tövsiyələr verib.

APA-Economics” bu barədə Azərbaycan Sığortaçılar Assosasiyasına (ASA) istinadən xəbər verir.

Məlumatda deyilir ki, pandemiya maliyyə bazarının tərkib hissəsi olan sığorta bazarına da öz təsirini göstərdi. Bu səbəblə xüsusi karantin rejimi şəraitində sığorta xidmətlərinin fasiləsizliyinin təmin edilməsi, habelə sığorta istehlakçılarının hüquqlarının qorunması məqsədilə nəzarət orqanı olan Mərkəzi Bank tərəfindən dəstəkləyici tədbirlərin həyata keçirilməsi nəzərdə tutulub: "Hazırlanan tədbirlər planı ilk dəfə 2020-ci il 29 aprel tarixində sığorta şirkətlərinə göndərilib və sığorta mütəxəssisləri tərəfindən müsbət qiymətləndirilib. Tədbirlər planın təsdiqlənməsi və ən qısa zamanda icrası məqsədilə 2020-ci il 5 may tarixində Mərkəzi Bankın nümayəndələri ilə Sığorta şirkətlərinin və ASA-nın rəhbər şəxsləri arasında video konfrans şəklində görüş keçirilib. Keçirilən görüş zamanı tədbirlər planında mövcud bəzi nüanslar müzakirə edildikdən sonra sığorta rəhbərlərinin ortaq qərarı ilə təsdiqlənib".

Bildirilir ki, xüsusi karantin rejimi şəraitində izolasiya qaydalarına uyğun olaraq müştərilər ilə sığorta şirkəti əməkdaşları arasında fiziki təmasın minimuma enməsi sığorta xidmətlərinin göstərilməsində müəyyən çətinliklər yaradıb. Bunu nəzərə alaraq həm müştəri məmnuniyyətinin təmin edilməsi, həm də sığorta şirkətlərinin maliyyə dayanıqlığının qorunub saxlanılması məqsədilə Mərkəzi Bank tərəfindən aşağıda göstərilən istiqamətdə tədbirlərin keçirilməsi ilə bağlı Rəhbərlərə tövsiyələr verilib:

1. Zərərlərin tənzimlənməsi ilə bağlı sığortalıların müraciətlərinin elektron poçt və elektron formada qəbul edilməsi (hadisələr barədə video və foto görüntülər daxil olmaqla);

2. Könüllü sığorta müqavilələri üzrə xüsusi karantin rejimindən birbaşa təsirlənən sığortalılara sığorta haqlarının ödənilməsində 2020-ci il 30 sentyabr tarixinə kimi möhlətin verilməsi;

3. Sığortaçılarda biznes proseslərinin pandemiya ilə əlaqədar yeni əməliyyat şəraitinə tam uyğunlaşdırılması üçün lazımi idarəetmə və texnoloji tədbirlərin görülməsi;

4. Könüllü sığorta müqavilələrinin elektron formada bağlanılmasının təmin edilməsi (Azərbaycan Respublikası Mülki Məcəlləsinin, “Sığorta fəaliyyəti haqqında” Qanunun və məlumatların mühafizəsi ilə bağlı hüquqi aktların tələbləri nəzərə alınmaqla);

5. Sığortaçıların öz internet səhifələrində xüsusi karantin müddətində iş rejimi ilə bağlı məlumatın və zərərlərin tənzimlənməsi ilə bağlı müvafiq prosedurlarını açıqlaması;

6. Sığortalıların hüquqlarının qorunması məqsədilə sığortaçılarda qaynar xəttin fasiləsiz işlək olması ilə yanaşı sığortalıların video zənglər vasitəsilə qəbulunun təmin edilməsi:

7. Sığortaçıların kapital mövqeyinin qorunması və gücləndirilməsi məqsədilə 2019-cu ilin nəticəsi üzrə dividend ödənişlərinin 30 sentyabr 2020-ci ilədək təxirə salınması və 2020-ci il üzrə aralıq dividendlərinin ödənilməməsi.

#
#

ƏMƏLİYYAT İCRA OLUNUR