Bu gün Türkiyənin milli valyutası olan lirənin ABŞ dollarına qarşı məzənnəsi tarixi minimumu yeniləyib.
"APA-Economics"in məlumatına görə, Türkiyənin Avropa İttifaqı ilə əlaqələrinin pisləşməsi fonunda lirənin məzənnəsi ötən günün tarixi rekord minimal göstəricini (7,88) ötərək yeni tarixi minimuma imza atıb. Hazırda 1 dollar 7,89 lirə təşkil edir.
Qeyd edilir ki, Türkiyə Mərkəzi Bankının valyuta ehtiyatlarının tükənməsi ilə bağlı narahatlıqlar və valyuta bazarına yüksək dəyərdə olan müdaxilələr fonunda lirə bu il dəyərinin 25%-ni itirib. Son vaxtlar geosiyasi narahatlıqlar da lirəyə qarşı təzyiqi artırıb. Proqnozlara əsasən, lirənin zəifləməsi davam edəcək və Türkiyənin bütün ili tənəzzüldə olacağı gözlənilir.