MDB

Ana səhifə

MDB

Rusiyanın Gürcüstandakı bazasından texnika yüklənmiş növbəti eşelon Ermənistana yola salınıb

07 iyun 2007 10:40 (UTC +04:00)

Rusiyanın Gürcüstanda yerləşən hərbi bazasından texnika, silah və sursat yüklənmiş növbəti hərbi eşelon bu gün Ermənistana yola salınıb. APA-nın Gürcüstan bürosunun məlumatına görə, eşelonun tərkibinə 35 platforma və vaqon daxildir. Ümumi çəkisi 900 ton olan 44 avtomobil, maşınlar üçün ehtiyat hissələri və 5 tank yüklənmiş eşelon Rusiyanın Gümrüdə yerləşən 102-ci diviziyasına təhvil veriləcək. Rusiya ilə Gürcüstan arasında əldə edilmiş razılığa əsasən 2007-ci ilin sonuna qədər Rusiyanın Axalkələkdə yerləşən 62-ci hərbi bazası, gələn ilin sonuna qədər isə Batumda yerləşən 12-ci hərbi baza ləğv edilməlidir. Köçürülmə planına əsasən, iyun-iyul aylarında 4, noyabrda isə daha bir eşelon Azərbaycan ərazisindən keçməklə Rusiyaya yola salınacaq. Batumidəki hərbi bazadan sursat və texnika yüklənmiş 4 eşelonun avqustda Ermənistana göndərilməsi nəzərdə tutulur. /APA/