MDB

Ana səhifə

MDB

Gürcüstan parlamentində Ahıska türklərinin repatriasiyası ilə bağlı qanun layihəsinin müzakirəsinə başlanıb

14 iyun 2007 08:51 (UTC +04:00)

Gürcüstan parlamentində Ahıska türklərinin repatriasiyası ilə bağlı qanun layihəsinin müzakirəsinə başlanıb. APA-nın Gürcüstan bürosunun xəbərinə görə, parlamentin Xarici əlaqələr komitəsində “XX əsrin 40-cı illərində sovet hakimiyyəti tərəfindən Gürcüstandan zorla köçürülmüş şəxslərin repatriasiyası haqqında” qanun layihəsi ilə bağlı dinləmələr keçirilib. Layihənin təşəbbüskarı parlament çoxluğu “Milli hərəkatdemokratlar” fraksiyasıdır. Deputatlar ölkədən zorakılıqla köçürülmüş insanlara münasibətdə tarixi ədalətin bərpasının vacibliyini bildiriblər. Sənədə əsasən tarixi vətənlərinə qayıtmaq istəyən türklər 2009-cu il yanvarın 1-nə qədər yazılı müraciət etməlidir. Gürcüstan vətəndaşı olmaq istəyən şəxslər başqa ölkənin vətəndaşlığından imtina etməli, gürcü dili, Gürcüstan tarixi və Konstitusiyası bilgisi üzrə testdən keçməlidir. Gürcüstan dövləti qayıdacaq şəxsləri yerləşdirməyi, onları mənzillə təmin etməyi üzərinə götürmür.
Xatırladaq ki, Ahıska türkləri 1944-cü ildə Gürcüstandan köçürülüb. Gürcüstan hökuməti onların geri qaytarılması ilə bağlı Avropa Şurası qarşısında öhdəlik götürüb. /APA/