MDB

- “Qızılgül inqilabı” dövründə Saakaşvilinin yaxın silahdaşı olan siz, Georgi Xaindrava və İrakli Okruaşvili bu gün ona qarşı çıxır. Ən yaxın silahdaşlar niyə prezidentin ən qatı düşməninə çevrilib?
- Mən heç bir zaman Saakaşvilinin silahdaşı olmamışam. Salome Zurabişvili Gürcüstanının demokratik yolla inkişafının tərəfdarı olub. Mən həmişə Gürcüstanın Avropa dəyərlərinə söykənən demokratik, azad və müstəqil dövlət kimi inkişafına çalışmışam. Heç bir zaman nə şəxsən Saakaşvilinin, nə onun partiyasının tərəfdarı olmamışam. Vəzifə başında olan zaman da Milli Hərəkat Partiyasının üzvü deyildim. Mən Saakaşvilinin deyil, Gürcüstanın tərəfdarıyam.
- İrakli Okruaşvili ilə bağlı baş verən hadisələrə münasibətiniz necədir?
- 20 min nəfərin iştirakı ilə Tiflisdə keçirilən mitinq İrakli Okruaşviliyə görə keçirilmirdi. Sadəcə, Okruaşvilinin çıxışı cəmiyyətdə olan həqiqətləri üzə çıxarıb. Cəmiyyətdə hökumətin demokratik dəyərləri, hüquqi idarəetmə sistemi, iqtisadiyyatın idarə edilməsi yolları ,özəlləşdirmə zamanı baş verən rüşvətxorluq halları ilə bağlı suallar yaranıb. Okruaşvilinin çıxışı bu sualları yenidən gündəmə gətirdi. Əhalinin özü-özünə verdiyi suallarla, məsələn, Zurab Jvaniyanın ölümü ilə Okruaşvilinin çıxışı üst-üstə düşdü. Heç kim buna görə əsas məsuliyyəti daşıyan prezidentə bu sualları verə bilmir. İrakli Okruaşvilinin çıxışından bir gün sonra həbs olunması isə onun söylədiklərinin həqiqət olduğunu deməyə əsas verir.
Keçmiş nazirin həbsi siyasi xarakter daşıyır. Onun partiya yaratdığı dövrdə həbs olunması siyasi məqsədlər güdür. Əhali küçələrə axışmaqla ölkədə yeni bir siyasi məhbusun peyda olmasına qarşı çıxdı. Təcridxanada baş verənlər isə göstərir ki, Gürcüstanda hələdə Sovet dövründən qalma qaydalar var. Mən əminliklə deyə bilərəm ki, təcridxanada İrakli Okuraşviliyə qarşı güc tətbiq olunub. Heç bir şəxs öz istəyi ilə siyasi imicini poza bilməz.
- İrakli Okruaşvili çıxışdan sonra həbs olunacağını bilmirdimi?
- Mən demirəm ki, onun dediyi hər bir söz doğrudur. Sadəcə, təcridxanada öz istəyi ilə bu cür açıqlama vermək siyasi cəhətdən intihar deməkdir. Dəqiq deyə bilmərəm ki, Okruaşviliyə qarşı hansı növ təzyiq olub. Ancaq mənəvi və ya fiziki təsirlərin sayəsində belə açıqlamalar vermək olar. Bir daha deyirəm, mən onun tərəfdarlarından deyiləm, Okruaşvili müxalifətin lideri hesab etmirəm. Bununla belə demokratik bir ölkədə belə bir yolla siyasətə gəlmək düzgün deyil. Keçmiş müdafiə nazirinin verdiyi açıqlamaların həqiqət olub-olmadığını araşdırmaq məhkəmənin səlahiyyətidir. Mən yalnız bu məsələyə siyasi baxımdan münasibət bildirə bilərəm.
- Okruaşvilinin başına gələnlər müxalifət düşərgəsinə mənfi təsir göstərməyəcək ki?
- Okruaşvili hadisəsi yalnız onun rəhbərlik etdiyi partiyaya mənfi təsir göstərə bilər. Əhali arasında aparılmış sorğunun nəticələri də göstərir ki, xalqın 93,8 faizi onun ikinci çıxışına deyil, ilk çıxışına inanır. Okuraşvilinin çıxışı onun siyasi imicinə mənfi təsir göstərəcək. Belə ki, əhali onun zəif və iradəsiz olduğunu düşünə bilər. Bu hadisə müxalifətin imicinə müsbət təsir göstərdi. Okuraşvilinin simasında xalq hakimiyyətdə olan qüvvələrin kim olduqlarını başa düşdü.
- Prezident və parlament seçkilərini vaxtını dəyişməklə Saakaşvili nəyə nail olmaq istəyir?
- Heç bir demokratik dövlətdə prezidentə seçkilərin vaxtını dəyişmək səlahiyyəti verilməyib. Parlament xalqın rəyi ilə formalaşır və hər bir seçilən millət vəkili müəyyən edilmiş vaxt çərçivəsində fəaliyyət göstərir. Artıq Saakaşvili və partiyası baş verən son hadisələrdən sonra populyarlığını itirib. Seçkilərin vaxtını dəyişməklə o, mandatını uzatmağa çalışır. Prezident əhalinin işsiz təbəqəsinə yeni iş yerləri açmaqla, maaşları artırmaqla itirdiklərini geri qaytarmağa çalışır. Digər tərəfdən Saakaşvili artıq seçkilərdə qələbə qazanmaq üçün lazımı qədər vəsait toplayıb.
- Müxalifətin seçkilərdə qalib gəlmək şansını necə qiymətləndirirsiniz?
- Bu gün Mərkəzi Seçki Komissiyasında bir nəfər də olsun müxalifət nümayəndəsi yoxdur. Onlar istədiklərini edirlər, bizim seçkilərdə qələbəmiz seçkilərin ədalətli və şəffaf keçirilməsindən asılı olacaq.
- Xarici siyasətdə təcrübəsi olan bir şəxs kimi Dağlıq Qarabağ münaqişəsinin həllini necə görürsünüz?
- Bizim də daxili münaqişələrimiz var. Ümumiyyətlə hər üç münaqişə - Dağlıq Qarabağ, Cənubi Osetiya və Abxaziya münaqişələri Sovetlər Birliyin yaratdığı və həll etmədiyi problemlərdir. Mənə elə gəlir ki, bu münaqişələr birlikdə həll olunmalıdır, çünki bura eyni regiondur. Münaqişələrin həllinə daha çox xarici təşkilatları, əsasən də Avropa Birliyini cəlb etməklə nail olmaq olar. Son iki ildə beynəlxalq təşkilatların münaqişələrin həllinə çoxda aktiv olmayan marağını görürük. Lakin bu üç Cənubi Qafqaz respublikası öz aralarında münaqişənin həllini tapmalıdır. Təəssüf ki, Gürcüstan ən yaxın qonşularının probleminin həllində yaxından iştirak etmir. Amma ölkəmizin bu prosesdə iştirakı və köməyi çox vacibdir.
- Müsahibələrinizin birində deyibsiniz ki, Azərbaycan Cənubi Qafqazda liderliyi ələ almaqla ABŞ və Qərbin Gürcüstana olan marağını özünə tərəf çevirir. Bunu nə ilə əsaslandıra bilərsiniz?
- Bildiyiniz kimi, Gürcüstan tarix boyu Cənubi Qafqazda əsas lider dövlət olub. Gürcüstan həmişə regionda lider olmaq uğrunda mübarizə aparıb. Lakin indi o, bu mübarizədə məğlub olmaq üzrədir. Bu gün bu mübarizədə əsas yeri Azərbaycan tutur. Gürcüstan mərkəzdə dayansa da, bu mövqeyindən lazımı qədər istifadə edə bilmir. Azərbaycanın regionda liderliyi ələ alması böyük dövlətlərin Gürcüstana olan marağının itməsinə səbəb ola bilər. /APA/